Annus
2 0 1 1


Ratko Mladic iudicibus Hagensibus tradetur

Ratko Mladic iudicibus Hagensibus tradetur

Duo fere milia Serborum Veneris die in oppido Pale reclamaverunt Mladicium comprehensum esse, ut iudicibus Hagensibus traderetur. Reclamantes, in quibus multi veterani fuerunt, cum in forum convenissent, regimini proditionem obiecerunt. Slobodan Batinic, veteranus XLVIII annorum, qui bello civili pro Serbis meruerat, „tristis sum et conturbatus“, inquit, „nam numquam credidi Serbos Mladicium prodituros esse. Isti heroem prodiderunt, qui populum Serbicum defenderat.“ Marko Mirkovic, veteranus L annorum, Mladicium similiter laudavit, quo „omnes Serbi gloriarentur, sine quo nulla umquam res publica Serbica fuisset.“

Postridie eius diei, quo comprehensus esset, iudices Serbici decreverunt nihil obstare, quin Mladic iudicio Hagensi traderetur. Ille autem recusavit, ne libellum acciperet, dicens: „Vos Milosevicium suffragati estis, non ego. Cuius ergo culpa illa facta sunt?»

Interim in ea causa iudices electi sunt hi : Christophorus Flügge Germanus, Alphonsus Orie Batavus, Bakone Moloto Africanus Australis.

Patronus Mladicii Veneris die de valetudine eius infirma et aegra locutus est. sui , cum eum visitavissent, petiverunt, ut in valetudinarium transferretur, ut a „medicis liberis“ inspici posset. Darko, filius eius, dixit se iam duos medicos Russos adiisse. Patrem aegre loqui posse, praeterea dextra corporis parte esse captum.

Scripsit Volfgangus Austriacus



Retro ad:

Novissima editio
Summum paginae