Dux IMF stupri accusatus

Moderator Internationalis Fundi Monetalis (IMF), Dominique Strauss-Kahn, apprehensus est a biocolytis Neoeboraci, quia ab huius urbis prosecutore generali accusatus est conaminis stupri puellae cubicularis in deversorio quodam catenae "Sofitel" prope plateam Times Square, ubi dux IMF habitabat pretio trium milium dolariorum per diem.

Dominus Strauss-Kahn, 62 annos natus, apprehensus est in aeriportu JFK cum iam aeronavi lineae Air France aderat Lutetiam petiturus. Puellam autem, quae conaminis stupri eum accusat, esse aetatis 32 annorum. Quae mulier dicit praesidem IMF, omnino nudatum, eam de porticu deversorii vi in suum cubiculum abduxisse, ubi conatus est cum ea rem Veneream habere. Postea, asseverat illa, dominus Strauss-Kahn citissime e deversorio profectus est, nonnullas res, sicut telephonum mobile, in cubiculo pone se relinquens.

Apprehensus Strauss-Kahn statim negavit se id crimen patrasse.

Rem hanc esse maximi momenti Francogallis, nam Strauss-Kahn videbatur esse principalis candidatus huius terrae factionis socialistarum ad munus praesidentis Galliae capiendum. Cum hodiernus praesidens e dextera parte oriundus, Nicolaus Sarkozy, minus minusque apud sui populum gratiam inveniat, Strauss-Kahn a multis putabatur certus dux civitatis futurus.

Martine Aubry, moderatrix socialistarum Francogalliae, dixit se novissimo nuntio allato omnino obstupuisse.

Anno 2008 Strauss-Kahn investigatus erat a consilio internali IMF propter erroneum habitum erga quadam cooperatrice. Pro qua re ipse veniam petivit apud IMF necnon sui uxorem, quae est "stella televisoria" Gallorum, Anna Sinclair.

Scripsit Stanislaus Varsoviensis