Novi nuntii de Guantanamensi carcere

Nova ex Vicirimis (Wikileaks) terribilia patefiunt per acta diurna Americana et Europaea: plicae enim huc usque abditae de septingentis captivis publicantur, unde iuris humani violationes plurimae confirmantur. Qui in caveis conclusi Cubam advecti esse referuntur et diu detenti non propter certa scelera sed levibus indiciis accusati vel ad facinora confitenda vi coacti. Vir undenonaginta annos natus ibi captivus mansit necnon adolescens XIV annorum.

Hoc etiam referunt Vicirimae, Osamam bin Laden, caedis immanis Novi Eboraci anno bismillesimo primo perpetratae reus, post scelus per decem septimanas in Afganistania plurimos asseclas accepisse et duas saltem orationes habuisse armatos ad bellum persequendum adhortans; eundem diebus illis autoraeda, non pedibus neque in asino vectum haud longe a Kabulia, maxima Afganorum urbe, plus quam semel locum mutasse.

Scripsit Herimannus Novocomensis