Veri Finni triumphant

Secundum primos effectus suffragandi, quintam fere partem in Finnia habitorum suffragiorum cepit nationalistica atque eurosceptica factio Verorum Finnorum, idem ut alterae duae maximi momenti factiones Finniae - Coalitio Nationalistica (NCP) et Democratae Sociales. Fieri ergo potest ut aut ipsis Veris Finnis detur munus regimen creandi (si, omnibus suffragiis calculatis, victores ex electione discesserint) aut ab alia factione victrice ad negotiationes coalitioni regiminali constituendae invitentur. Qua re effici potest, cum scilicet Veri Finni regimen intrent, ut... subsidia Unionis Europaeae iam Lusitaniae (Portugaliae) promissa, necnon similia futura subsidia aliis terris crisi fiscali laborantibus danda, minime dentur.

Veri Finni (quibus praeest Timo Soini, photographemate monstratus, recte se suosque "equum nigrum" electionis fore praedicens) volunt enim ut subsidia pecuniaria aliis terris UE danda pendeant a plebis scitu civium Finnorum. At incremente per totam Europam spritu eurosceptico atque minore in dies voluntate suam pecuniam alicui aliae terrae crisi laboranti praebere, facile fieri possit, ut Finni subsidia plebis scitu improbent. Eodem factu subsidia haec omnino improbentur, nam ad ea efficienda necesse est, ut omnes 17 terrae sociae zonae euro iis consentiant. Finnia autem sola harum omnium terrarum fieri mox potest, ubi subsidia plebis scitu confirmari debeant; aliis 16 in terris de his rebus consilia capiunt sola regimina.

Rerum Finnorum periti putant tamen negotiationes inter Veros Finnos et alias factiones nullo cum effectu mox finituros et tunc coalitionem factum iri a supradictis duabus factionibus - NCP, Democratis Socialibus - una cum Factione Centrica (quae aliquantulum minus, i.e. circiter 15% suffragiorum collegisse videtur). Talis coaliltio sit similis adhuc Finniam regenti coalitioni quattuor factionum, quarum maxima usque hodie fuerat Factio Centrica.

Scripsit Stanislaus Varsoviensis