De fusionis nuclearis initio

Crebritas radiorum nuclearium ex electrificina Fukusimae effusorum increscit atque res in peius mutari videntur: iodum radioactivum in mari abundans detectum est. Japoniae regimen opinatur ingentis radioactivitatis causam incipientem fusionem fustium ex uranio in secundo reactorio fuisse. Etiam tubi aquiferi tertii reactorii damnis affecti esse putantur, ubi non solum uranium sed etiam perniciosissimum plutonium ad vim nuclearem gignendam adhibebatur. In quinque locis circum electrificinam plutonium in solo compertum est. Europa expers usque ad hunc diem est nubium radioactivarum inde ventis allatarum.

Neque terra tremere desinit: in alto mari pro ora praefecturae Miyagis seismus gradus sexti Richteriani factum est, cum tamen motus XVII chiliometra sub maris aequore evenerit, nullum damnum refertur.

Scripsit Herimannus Novocomensis