Lukaschenko Germanos Polonosque coniurationis insimulat

Alexander Lukaschenko, praeses Belorussiae, Germaniam Poloniamque palam coniurationis contra se parandae insimulavit: "In his terris", inquit, "consilia capiuntur rem publicam nostram mutandi". Opes, quae ad hanc rem necessariae essent, ab utraque civitate praeberi.

Praeterea Lukaschenko Unioni Europaeae minatus est his verbis: "Si quis commeatu aut commercio nos intercludere velit, sine mora huic conatui occurremus". Quod cum Concilium Europaeum poposcerit, ministri rerum exterarum hoc mense exeunte de ea re consiliabuntur. Causa est, quod de eventu electionis a.d.XIV.Kal.Ian. habitae dubitatur, e qua Lukaschenko iterum victor exiit, cui plus LXXX centesimae suffragatorum faverant.

Reclamationes eorum, qui regimini oppositi sunt, a vigilibus publicis reprimebantur. DC fere ex reclamantibus, in iis nonnulli candidati praesidiatus, comprehensi et accusati sunt.

Scripsit Volfgangus Austriacus