Annus
2 0 1 1


Israeles bellum novum parant

Israeles bellum novum parant

„Si vis pacem, para bellum.“ Secundum hanc sententiam Israeles et bellatores partium Hisbollah agere videntur, si respicis, quantam operam utraque pars bello novo parando insumpserit. Schiitae copiam armorum, quam habuissent bello Libanensi novissimo, interim multiplicavisse dicuntur.

Saad Hariri, primus minister Libanensis, monuit, ne novum bellum regioni perniciei esset. Hoc si fieret, regimen Libanense, cui a civitatibus occidentalibus faveretur, interiturum. Ex litteris Americanis in pagina interretiali “WikiLeaks” publicatis apparet Haririum timere, ne partes moderatae, quae a Civitatibus Unitis et a Saudiarabia adiuventur, maximum detrimentum capiant, si Israeles denuo partes Hisbollah excidere conati sint.

Gabi Ashkenazi (photographemate a laeva parte monstratur), qui exercitui Israeliano praeest, dixisse fore, ut Israeles a nulla vi se abstinerent, etiamsi locis frequentissimis pugnaretur. Iam anno MMIX se in exercitu“bellum magnum” paravisse.

Quadriennio ante Israeles duobus militibus abductis Libanum vehementer aggressi sunt. Multo post corpora eorum cum captivis Libanensibus permutati sunt. Eo bello Israeles neque id, quod sibi proposuerant, assecuti sunt et cladem inopinatam acceperunt multis militibus civibusque amissis. Contra Hassan Nasrallah, dux Hisbollah, concessit se, si scivisset, quam vehementer Israeles aggressuri essent, illos milites abduci non iussurum fuisse.

Amos Yadlin, qui officio militari exploratoribus arcendis praeerat, pro certo habet bellum proximum multo maius fore, in quo numerus mortuorum et vulneratorum multo maior sit quam bello priore.

Officia secreta Israeliana accuratissime res observant, quae in Libano geruntur. Hoc biennio ibi plus CL homines comprehensi sunt, qui explorationis pro Israelia factae insimulabantur.

Sunt, qui putent impetum exercitus Israeliani inevitabile fore, ut copia armorum, quae Schiitae habeant, minuatur. Imprimis missilia ab Irania accepta, quae ad CC chiliometros volare possint, praefectos exercitus sollicitant. Ex quo evenit, ut non de bello ipso, sed de tempore tantum quaeratur.

Scripsit Volfgangus Austriacus



Retro ad:

Novissima editio
Summum paginae