Annus
2 0 1 0


LUCANIAE VICORUM THESAURI

LUCANIAE VICORUM THESAURI

Pulcherrima rustica gemma, id est casa rustica, XVIII saec. aedificata, "Zétema societate" auctore nuper in pristinam condicionem restituta est. Zétema, publicis et privatis opibus, curat res antiquas in Lucania reficiendas. Casa rustica, de qua loquimur, a pastoribus adhibebatur qui a litoribus ad montes transibant itinera per rura facientes. Hac in casa unum vel duos dies commorabantur et sibi quietem dabant. Circum casam in saepto grex quoque quiescebat. Ex tribus partibus haec constat : cubiculo, stabulo et foco. In cubiculo (ex quo tholus rotundus extat) pastores quiescebant, in stabulo (rectiangula forma) asini, muli vel equi, in foco (ex quo caminus altus et inusitata forma extat) casei varii generis ferebantur ; e pastoribus erat qui in casa manebat caseos venditurus villicis qui a proximis locis concurrebant. Ager, ubi casa extat, olim Monti Caveosi (italice Montescaglioso) Abbatiae possessio fuit,, cui consuetudo cum proximis Orientis partibus fuerat. Ex quo intellegi possunt inusitata camini forma et rotundus tholus, quare haec casa parvo templo mahometano turrito similis videtur. Napoleonis legibus vigentibus casa Abatiae adempta est; postea, Italia una facta, privati civis propria fuit.

http://www.sassiland.com/notizie_matera/notizia.asp?id=5383&t=inaugurazione_del_%22casone_della_murgia%22


Imagines casae: pars exterior et pars interior

Admodum pretiosa opera arte facta putatur quae "Peccati Innati Crypta" ab artis peritis appellata est. Anno MDCCCCLXIII detecta prope Matheolam (ital. Matera), ab eadem Zétema, nonnullarum argentariarum opibus, refecta est. In cryptae parietibus, in saxo effossae, magnificae picturae (VIII-IX saec.) abundant, quae Biblia picta pro villicis fidelibus esse videntur. Plurimi visitatores, praeter artis peritos, hanc Lucaniae partem (cui Murgia nomen est, inter Lucaniam et Apuliam posita) adveniunt, ubi saxeae cryptae pretiosis figuris pictis praeditae abundant

 

http://www.archart.it/archart/italia/Basilicata/Matera%20-%20cripta%20del%20Peccato%20Originale/foto-MateraCrPOr001.html

Imagines cryptae: aditus et pars interior

Scripsit Dominicus Gallipoli



Retro ad:

Novissima editio
Summum paginae