Annus
2 0 1 0


FRATER NICOLAVS

FRATER NICOLAVS

Hoc nomine, quod Teodisce sonat Bruder Klaus, appellant Hevetii suum caelestem patronum, quem enixe amant ac venerantur. Ille natus est anno millesimo quadringentesimo septimo decimo (1417) in oppido Flüeli prope Sachseln, in regione Obwaldensi. Iam a puero piissimus, post visionem, quam adulescens annorum sedecim habuerat in oratione, inclinabatur quidem ad vitam solitariam Deo dicatam, sed censuit sibi assumenda esse munera civilia et militaria, quae illi instanter offerebantur a concivibus. Illi bene conscii eius strenuitatis et rectitudinis, elegerunt eum praefectum municipii Sachseln, consiliarium et iudicem regionalem ac demum senatorem totius confoederationis Helveticae. Annos natus viginti octo uxorem duxit Dorotheam Wyss, qua nati sunt ei decem liberi: quinque filiae totidemque filii, quorum unus futurus erat sacerdos parochus Sachselnensis, nepos autem nomine Conradus Scheuber victurus in fama sanctitatis.

Hortatu Matthaei Bolshemensis et Haimonis Armgrundensis appropinquavit Amicis Dei, quo nomine appellabatur coetus religiosus origine Alsatinus. Cum tamen vellet illuc ingredi, restiterunt concives, qui nullatenus volebant privari tam claro praefecto atque milite, sed imprimis hoc nolebat uxor Dorothea, quae secus mansisset sola cum filiis educandis. Nicolaus igitur denuo debuit rem differre, quam tandem consensu uxoris consecutus est iam quinquagenarius, nempe Iulio mense anni 1467.

Profectus est quidem in Alsatiam, sed brevi reversus in patriam, ubi consedit prope oppidum Klisterli-Alp in regione Melchtalensi. Ibi, secundum testimonia fide dignissima, Nicolaus annos undeviginti et semissem vescebatur seu sustentabatur solo Christi corpore sacramentali. Quod cum suscitavisset vicinorum curiositatem una cum admiratione, ille transiit in caveam nomine Ranft in loco solitario prope nativo Flüeli. Inde egrediebatur solum ad audiendam Missam, sed etiam – et solummodo – ter ad patriam iuvandam in calamitatibus: anno quidem 1473 in periculo imminente a parte Austriae, annis atem 1481 et sequenti ob periculum belli civilis inter Helvetios. Quibus discriminibus fauste superatis interventu et precibus fratris Nicolai, eum Helvetii libenter titulo ornaverunt Patris Patriae.

Vicini Flüelienses, admirantes pietatem Nicolai, prope caveam Ranft ei aedificaverunt habitaculum et sacellum, ubi tranquille vacaret orationi. Ibi mortuus est septuagenarius, die 21 mensis Martii anno 1487. Beatis annumeratus anno 1669, canonizatus est anno 1947 a papa Pio XII, qui insuper eum constituit patronum Helvetiae.

Scripsit fr. Benedictus Huculak, OFM



Retro ad:

Novissima editio
Summum paginae