Volare, oh oh!.... in Lucania "angeli" volant

Nemo est qui illum italicum cantum ignoret, cui nomen est (italice) “Nel blu dipinto di blu”. Cantor quidam Dominicus Modugnus ab a.D. MCMLVIII toto in orbe hunc cantum pervulgavit,

http://www.youtube.com/watch?v=Z-DVi0ugelc

cui permulti nomen dederunt “Volare”. Pauca de huius cantus verbis: quidam in somnio videtur vento in caelum caeruleo colore pictum eripi et volare incipere, dum musica suavis aures permulcet et mundus minimus fit; sed somnia prima luce evanescere solent; cum amata caeruleis oculis in terra vivere ardenter cupit. Hic cantus illo tempore verba musicamque novavit, quasi ventus qui vividus afflans vetera dispelleret.

In Lucaniae montibus, qui Dolomiti Lucanae appellantur, hoc inopinatum accidit: “angeli” volant!

Nova et insolita voluptate afficiuntur qui aerium cursum (MD metrorum circiter) percurrunt ad funem ex ferro ligati ab urbe Castro Mediano (italice Castelmezzano, quae in secunda imagine adposita effingitur) ad urbem Petraperciatam (italice Pietrapertosa, in infima imagine) aut rursus. Velocius (120 Kh circiter) “angeli” in caelo cursum percurrunt domuum tecta, summos dentatos montes, virides arbores, vias tortuosas et caelum immensum intentis oculis complectentes. Non solum ab Italiae regionibus sed etiam ab externis nationibus perveniunt “angeli” qui insolitam aeriam voluptatem exsperiri cupiunt.

Scripsit Dominicus Caveosanus