Enricus Morente diem supremum obiit

Enricus Morente, cantor et modulator illustrissimus, natus est Granatae in Hispania meridionali anno 1942. A puero musica vandaliciana, hispanice flamenco, assuefactus est. Postea 18 annos natus, Matritum advenit ubi apud optimos magistros musicosque discere perrexit.

Initio flamencum classicum strenue coluit sed brevi tempore coepit carmina poetarum hispanorum cum musica vandaliciana miscere et cum musicis aliorum generum arcte cooperari, quam ob rem maximi momenti novator flamenci habetur, etsi nunquam modos classicos deseruit.

Hujus fidelitatis erga flamencum classicum testimonium exstat saepissima cooperatio cum musicis velut Camarón de la Isla necnon Camen Linares et Miguel Poveda.

Die 13 mensis Decembri Enricus Morente post operationem cancri oesophagi quae in inopinatas difficultates incurrit e vita decessit.

Quam mortem immaturam omnes Hispani lugent.

Scripsit Xavierus Ortiz