Annus
2 0 1 0


Legite historiam!

Legite historiam!

Puta parumper, lector humanissime, tibi qualibuscumque causis memoria evanuisse, teque nullius rei posse recordationem habere; quid durius? quid angore plenius? nescires quis esses, unde venisses, quo sis iturus, quos propinquos haberes, quam vitam degisses praeteritam; hae anxietates simili modo populos afficiunt; historia humano generi memoria est, dumtaxat sola facta eorumque dies atque nominum illustrium elenchum ne unice memoremus.

Sine historia populus vel natio identitate caret, nec potest suas mutationes intellegere; historica meditatio ad mundum  hodiernum intellegendum ducit: quo itinere humana societas progreditur? quo modo cultura vel animi cultus ubique terrarum aestimatur? qua mente res sociales, politicae oeconomicaeque reguntur?

Notitiae nobis undique veniunt, quas oportet examinare et systematice ordinare, ita ut sub specie significationem inveniamus; pueri ad historiam sunt vocandi, sed in eam historiam, quae a litteris Graecis et deinde Latinis coepit, non solum in eam, quae ab hesterna die, qua genitus a parentibus sit, initium cepit.

Scripsit Paulus Kangiser



Retro ad:

Novissima editio
Summum paginae