GERMANI PUTABANT EUM AMENTEM ESSE

Tubicen litoris Normanniae

Mortuus est Villelmus (Bill) Millin, 88 annorum, qui die 6 mensis Iunii 1944 anni, dum in septentrionalibus Galliae litoribus exponuntur ingentissimae Britannorum Americanorumque militum copiae statimque tormenta bellica Theodisca crepitare incipiunt et circumcirca glandes plumbeae sibilant, impavidus ille procedebat tibiâ canendo utriculariâ, e qua soni commilitonibus pergrati emittebantur. Milites Germani, etsi facillimum sibi fuisset illum hostem inermem confodere, tamen Villelmo parcere voluerunt putantes eum amentem esse. Illorum proeliorum superstites ac nonnulli cives Britanni mortem Villelmi sincere lugent:

http://tinyurl.com/38m6ca9

In tubicinis illius memoriam, qui natione Scotus erat:

http://tinyurl.com/2vmr9sf

Scripsit Victorius Ciarrocchi