REPERTUM IN CATACUMBIS ROMANIS SANCTAE THECLAE:

Antiquissimae imagines Apostolorum

Post biennium deditum ab archaeologis studiis magnoque labori singulae imagines sacrae omnium antiquissimae Apostolorum Petri, Pauli, Andreae, Johannis reparatae sunt apud catacumbas Sanctae Theclae, in camera Cubiculi Apostolorum, non longe a Basilica Sancti Pauli Extra Moenia. Restitutores operam dederunt huic monumento per quosdam menses, adhibito in hypogeo radio laserico; qui effecit ut crustam calcaream abstulerit qua imagines tegebantur. Res omni spe deiecta esse videbatur aqua promanante, ut solet, in hypogeis Romanis. Radius lasericus programmatur ita ut partes colore carentes deleantur, sed tinctae serventur; simul calcar decidit et quod mirum visu est, picturae, relictis stercoribus, nuper confectae videntur: graphicoterus aspectus optimus est. Clipei in quibus possumus facile Apostolos agnoscere,  IV saeculo post Ch. n. picti sunt; qui numquam antehac inventi sunt in singulis imaginibus.

Abhinc superiorem annum reperta est imago Pauli, vultu longiore et severiore, in clipeo aureo cum rubro; deinde archaeologi invenerunt alios clipeos ubi Sancti Petrus, Andreas, Johannes apparuerunt; praesertim Petrus statim recognitus est canis capillis et barba, senex facie, quadratus vultu.

Matrona Romana curavit faciendum cubiculum cum camera picta ut sepulcrum : nam in camera etiam imagines matronae ostenduntur: domina ornata gemmis monstratur orans cum filia.

Archaeologi putant hoc monumentum imitatum esse Martyrium Sancti Pauli quod, ut exstat, exstructum est IV saeculo, tempore quo etiam cubiculum aedificatum est: nihil videlicet Martyrii mansit. Cubiculum, ut putandum est, imitatur mausoleum vel basilicam:  in media parte camerae Pastor ovium est; circum eum sunt Apostoli, ut in absida cuiusdam ecclesiae vel apud Mausoleum Ravennate Gallae Placidiae. Quod singulare videtur esse, supra monumentum aedificium exstructum est abhinc quinquaginta annos, cum nullum detrimentum reliquiis archaeologicis allatum esset.

Auctor huius inventionis fuit Fabricius Bisconti, qui praeest curae catacumbarum et docet Archaeologiam Christianam et Mediae Aetatis apud Universitatem Studiorum Romae Tertiae ( Italice Roma Tre).

Scripsit Lydia Ariminensis