De mutatione et fabricatione viventium

Tres Latiniastae humanistaeque peritissimi - Carolus, Xavierus et Victorius - disputant de effectibus novissimi reperti Craige Venter (qui photographemate infra monstratur). De ipso reperto Venteriano legere potes, lector care, symbolam Herimanni Novocomensis in rubrica SCIENTIARUM die 23 m. Maii positiam.

CAROLVS:

CHROMOSOMATE IN VITRO COMPOSITO EX INERTE PORTIONE MATERIAI, DEHINC IN FERMENTO POSITO, VT IN ALIENAM VARIATA FORMA FIERET CELVLA NOVA, FACTA FERTVR EXTITISSE MANV ET LABORE DOCTORIS CRAIG VENTER (CVI GENOMATIS QVOQVE REPERTI CONTIGIT GLORIA LABORE).

http://tinyurl.com/36zp33e

QVO EXEMPLO TANTA HAVERE QVANTA CAVERE LICET, NAM GENVS HOMINVM TENDIT AD ABVSVM SCIENTIAE IN PERNICIEM CONVERSA SVAM; NEC PROVIDERI POSSIT, TANTA DE ARBORE VITAE ACCEPTA SCIENTIA, QVAS MVTATIONES INDVCERE, QVALESVE CONABVNTVNTVR SCIENTES EFFICERE CREATVRAS. NOVA ERGO MONSTRA NON SINE RATIONE TIMENTUR. VALETE.

XAVIERUS:

Quamquam uita nondum fabricata est, iam fabrefactum est genoma exscriptum expressumue e bacteria Micoplasma micoide et exercet suum munus in alia, cuius genoma ablatum erat, bacteria. Nisi fallor, genoma artificiale ipsum sese replicauit quasi naturalis bacteriae Micoplasmae micoidis. Philosophice uel religiose, dei non negentur sed quodammodo fiant Epicureo Lucretianoue more longinquiores uel Deus maneat erga res ultimas complexiores magisue intricatas. Valete.

VICTORIUS:

Sententiis Vestris, Carole et Xauiere, quas de hoc graviore invento non inepte scripsistis, addiderim e SOPHOCLIS tragoedia 'Antigone' verba haec: «Multa quidem sunt terribilia (sive: periculosa); nihil vero est homine terribilius (seu: periculosius)» (vv. 332-333). Nam adiectivum Graecum, quod est <deinós-é-ón>, plerumque Latine significat <terribilis, horrendus, metuendus>.

CAROLVS:

"IN PRINCIPIO" SCRIPTVM EST "VERBVM ERAT". - SPECIES QVOQVE VIVENTIVM, EARVMQVE FACIES, ET INDOLIS SPECIALIS, VERBATIM DESCRIPTAE IN GENOMATE VIDENTVR. QVO PER MODOS NATVRAE MVLTIPLICATO "VERBO", EA METAMORPHOSIS IN CELLVLA ALIENA CONSTITVI POTEST, VT OMNINO DISSIMILEM SVI PROGENIEM FACIAT. VTINAM EX BESTIIS HOMINES, NON EX HOMINIBVS BESTIAS QVANDOQVE FACERE CONENTVR. NAM VSVRPATO MAGNORVM IMPERIO DEORVM, IAM IAM MVLTA MIRACVLA FACTVRI VIDENTVR; ANCEPS CONATVS DATA FACVLTATE PROPAGANDAE CVIVSLIBET FORMAE VIVENTIVM IN LABORATORIO, IN DETRIMENTVM LETHALE CETERARVM. VALETE

XAVIERUS:

Quodammodo, haec res biotechnica gesta, 'cari sodales , sit spiritualis nam quodammodo spirituale est intellectum ualere ad liberius manipulandam materiam.Taliter intellectus fit magis ingenuus taliterque forsan ualebit ad inueniendum quomodo conscientia et emotiones emergant e materia, id es ad inueniendos earum fontes origenesue tangibiles et quomodo e tangibile factum sit quod est haud tangibile in actu tangibilis. De periculis, quanto magis pollens fit quaelibet res, tanto magis potest benefacere ac nocere sed uellem propter pericula non abnuere augmento hominis fabri.Vellem non (non tantum nollem) eiurare hominem fabrem, non eiurare hominem sapientem cuius spiritus inferitur per eius opera siue instrumenta, picturas et simulacra quae prehistorici atque archeaeologi reperiuntur.

Vt Benedictus Spinossa scripsit, bonum est quod adauget potentiam agendi. Tamen uerum, bonum est exstare qui caueant ne tali ui agenti atra nimis fiant.

Denique, imitari genoma gradus mihi uidetur itineris incepti olim in pingendis feris et Veneribus in parietibus speluncarum praehistoricarum. Rupe olim pictá,

Genomate nun arte,

Vmbram iter petit.

CAROLVS:

HODIE QVOD CAVLIS, CRAS CERVA ERIT: FICTA IN CELLVLA GENERIS ALIENI NOTA. SIVE GRAECA DICITVR GENOMA VOCE. INTERIM VIRIDES CERVI NASCI POSSVNT CAVLESQVE VELOCES, CREATORIS ARTES ADHVC DISCENTE FABRO. TALI POSSVNT MONSTRO PRISTINI FOEDARI SALTVS, HVMANA IN FOEDVS GENERATIONIS INLATA MANV. VTINAM HOC REPERTVM ADDATVR ARMAMENTARIO PACIS, SALVTIS, VITALIS; NEC VERTATVR IN NOVA TERRIBILIS

INSTRVMENTA MAVORTIS: SICVT EST SOLITVS CORRVMPI REPERTORVM VSVS. VALETE.

Scripsit Ca-Xa-Vi