Annus
2 0 1 0


BEATA ET OPEROSA SENECTUS IN PARVA TUSCIAE URBE (

BEATA ET OPEROSA SENECTUS IN PARVA TUSCIAE URBE (San Quirico d’Orcia, Siena)

Hac in urbe plures admodum senes sunt, qui vitam operosam agunt, hoc modo mortem a se amovent. Non vivunt a consuetudinibus et negotiis segregati. Fovente municipio, in suis domibus non in hospitiis habitant, amicis utuntur, industriam in variis rebus ponunt. Urbis praefectus (Robertus Rappuoli) agellum colendum tradit illis, quibus non est. Ideo seduli senes (hic multi sunt octoginta quinque annos nati) agellum colunt, animalia alunt, cibis vescuntur quos ipsi paraverunt, filios et amicos et propinquos ad cenam vocant. Non sentiunt se senectute oppressos. Vivunt.

Sunt senes qui ad pueros prope scholastica aedificia attendunt, qui hortos custodiunt, qui ceteros senes iuvant quibus exigua facultas est alicuius rei faciendae.

Quotannis mense Iunio ritus Federici Aenobarbi celebratur, qui traditur hac in urbe legatos pontificis Adriani missos accepisse: quattuor vicorum cives arcubus et vexillis certant; senes mensas parant et, quod eorum praecipuum officium est, vinum eligunt.

Tria fere milia civium hic vivunt; mihi venit in mentem … illuc migrare. Lectores obsecro ne me sequantur, propterea quod … parva est urbs S. Quirico d’Orcia.

Scripsit Dominicus Gallipoli



Retro ad:

Novissima editio
Summum paginae