Pericula Unioni Europaeae anno MMX subeunda

Parum Unioni Europaeae celebrandum est: nam anno MMIX viginti septem socii instituta communia vix perficere post acerbum decennium desierunt. Foedus Olisiponis, heres mortuae legis supremae a civibus Francogallicis necnon Batavis reiectae, Kalendis Decembribus vigere coepit post incompositum adprobationis iter. Sed arduum est ex somno expergisci: tum, cum gravitatem suam in orbe pollere putabat, Hafniae Unionis Europaeae legati se intellexerunt excludi posse a pugna contra caeli commutationem, qua se cautela et perseverantia praestare putaverant. Vetus continens non praevaluit coram Sinis et Civitatibus America Unitis, quarum minus intererat emissiones calefactionis universalis causas moderare, neque eis persuasit ut exemplum suum sequerentur: Hafniae monitus solam disputationem de climate superat, Unionis institutorum nuper confectorum opera incipiente.

Hermannus van Rompuy Belgicus, praesidens electus consilii Europaei, pridie Nonas Januarias munus suscepturus est: cuius erit septem et viginti ministros primarios et praesidentes ita componere, ut coniunctim de omnibus gravibus rebus agatur. Hermannus Josepho Emmanueli Barroso, praesidenti Europaei collegii usque ad mensis Januarii finem confirmandi, constanter interloquetur et auxilio Britannicae Catharinae Ashton fruetur. Cum tamen et Hermannus et Catharina (quod in imagine hilares aspicis) apud omnes fere obscuri sint, cavendum est ne dissonanter eloquantur.

Omnibus constat post foedus Olisiponense efficacius Europam amplificatam acturam esse eiusque gravitatem auctum iri: nam maioris momenti posthac erunt deliberationes senatus Europaei singularumque civitatum intercedendi ius resecabitur. Imperita domina Catharina videtur: cuius primum munus erit rerum externarum peritos sibi comparare. Post tot annos, cum Europae rectores umbilicis suis tantum contemplandis se dedicaverant, de rebus agendum est: sed maximi momenti erunt singularum civitatum voluntates. Si modo rectores summi et praesidentes coniunctim agere coeperint, Hermanni Van Rompuy auctoritas orietur: haec est gravissima quaestio anni bismillesimi decimi, quo tempore sodalitas Europaea propter discrimen oeconomicum exercebitur.

Scriptum hoc, quod in actis interretialibus Francogallicis Le Monde Kalendas Januariis anni MMX apparuit, in linguam Latinam conversum est.

Scripsit Herimannus Novocomensis