Annus
2 0 1 0


De profugis Eburneis

De profugis Eburneis

XIV milia profugorum ex Litore Eburneo fines Liberiae transierunt, ut pericula in patria effugerent; Ordo Nationum Unitarum nuntiat multitudinem increscentem commeatus et auxiliorum indigere, quamquam XXX milia exulum accipi possint. Profugi, plerumque fautores candidati mense praeterito victoris Alassani Ouattara necnon feminae cum filiis et filiabus ex regionibus occidentalibus adveniunt.

Interea tres praesidentes civitatum Africae occidentalis in Litus Eburneum convenient Laurentio Gbagbo praesidenti, quem cives suffragiis reiecerant, suasuri ut sellam supremam derelinquat, sicut etiam praesidentes Civitatum Americae Unitarum et Francogalliae optant. Laurentius contra magistratum summum cedere non vult, adversarium Alassanum de ambitu accusans. Iam fere ducenti homines propter dimicationes interfecti esse narrantur, verentur observatores ne bellum civile exoriatur.

In Litus Eburneum more solito operarii catervatim ex finitimis nationibus immigraverunt, nam ibi abundant theobromatis aliarumque plantarum tropicarum feraces culturae; si suam quisque patriam timoris causa redeat, tota Africa occidentalis gravi perturbatione afficiatur.

Scripsit Herimannus Novocomensis



Retro ad:

Novissima editio
Summum paginae