Quadruplex calamitas Haitiam vexat

Ex  natura, terraemotus et cholerae epidemia et turben procellosum; ex re política, electio nuper facta dicitur falsis suffragiis irrita declaranda; sic res se habent in miseranda republica Haitiana. Populus Haitianus strenuus se praebuit ut omnes calamitates perferret et solidarietate internationali non indignus videtur.

Haec calamitates, ex quibus multi de vita exierunt, non obstiterunt quominus electiones democraticae fierent ut novum Praesidem Reipublicae crearent; tamen quoniam undeviginti candidati id munus postularunt eorum nemo maioritatem obtinere potuit et comitia iteranda sunt, qua de causa non ante mensem Ianuarium eventus certus erit cognitus. Praesidi nunc vigenti Renato (René) Préval auctoritas politica auxiliumque civile quodammodo desunt  et a civibus est desertus adeo ne rempublicam redintegrare possit. Id est gravissimum quod Haitia natio irrita facta est, et adeo omnium rerum egena, ut superesse possit unice sub ea condicione, ut exterae nationes auxilium et vigilantiam praebeant, nec non Organizatio Nationum Unitarum. Periculum instat ut copiae exterae, quae in Haitia perturbationes pacandi causa iam aliquot annos permanserunt, perennes fiant, idcirco haec natio non erit politice autonoma.

Ipsi tamen Haitiani hunc rerum statum provocarunt gubernationis ac democratiae impotentes, et idcirco illis demum perturbationes superandae sunt; interea suffragationes die dominica 28 Novembris multi cives ex factionibus politicis contrariis fraude et dolo irritas esse postulant; exinde novae perturbationes.

Fons: El Mercurio, die 29 Nov. 2010, partim (Alexandra van Nievelt et pagina editoris)

Scripsit Paulus Kangiser