De Pacistania restituenda

Argentaria Mundana nongentos miliones dollariorum rei publicae Pacistanorum commodabit, ut civitas eluvie vastata restituatur. Ducenties centena milia saltem homines putantur calamitate affecta esse, duo milia interiisse. Ordinis Nationum Unitarum legati auxilia nihilo minus lentius aiunt allata esse et CL tantum miliones dollariorum - plerumque a Civitatibus Americae Unitis - ad urgentissima adiutoria ferenda pensa esse, cum triplicis confestim opus sit. Argentaria Mundana pecuniam ex aliis necessitatibus aversura est: nam timent auctoritates saluti addictae ne cito contagiones diffundantur, quas iam constat insedisse, neve complures inedia moriantur. Interea in provincia Sindh alia factio politica aliam accusat, quod aggeres diruerint ut suas urbes agrosque servarent: in Belucistania urbs Jacobadad verbi gratia defensa est, circumstantibus urbibus inundatis.

Etiam in Casmiria, regione Indica, graviter affecta est provincia Ladakh, ubi subita eluvio LXXX homines demersit: cuius incolis promisit minister primarius Indiae post decem septimanas omnia aedificia restitutum iri.

Scripsit Herimannus Novocomensis