ISLANDIA AD PORTAS UNIONIS EUROPAEAE

De piscatione aereque alieno...

Die Martis Islandia officialiter coepit cum magistratibus Bruxellensibus negotiari statum terrae sociae Unionis Europaeae (UE). Statum membri UE petere Islandi decreverunt, postquam annis 2008-2009 crisi hypothecaria afflicta esset haec insula horribiliter ac maximae eius argentariae decocturam pronuntiavissent. Viri politici Islandici tunc consilia ceperunt sibi suisque tutiorem sortem fore intus UE, communi nummo utentibus (solos quattuor ultimos menses 2008 anni Islandica corona amisit 80% valoris erga dollarium USA).

Theoretice accessio Islandiae Unioni Europaeae citissime progredi poterit, nam haec terra, ut membrum Europaeae Areae Oeconomicae (quae praeter terras socias UE continet quoque Norvegiam, Liechtensteiniam et ipsam Islandiam), oeconomiam de facto iam normis UE aptatam habet. Rixae tamen oriri possunt in licentiis navibus aliarum terrarum UE datis in mari prope litora Islandica piscandi necnon ob aes alienum argentariae Landsbanki, quae circiter 3,8 mld euronum pecuniae creditae debet 320 milibus civium Britanniae Bataviaeque. Harum duarum civitatum regimina minantur se introitum Islandiae in UE vetituras, nisi pecunia suis civibus reddatur.

His tamen difficultatibus superatis Islandia - secundum prognoses analystarum - terra socia UE iam anno 2012 fieri poterit, unum annum post exspectatum introitum Croatiae.

Scripsit iconoclastes.blog.onet.pl