ANXIETAS RERUM OECONOMICARUM EUROPAE MERIDIONALIS

Aesitmatio Lusitaniae deminuta

Die Martis agentura aestimatoria Moody's Investor Service deminuit duobus punctis, usque gradum A1 (cum prospectu stabili), aestimationem credibilitatis aeris alieni solvendi a regimine Lusitaniae (Portugaliae), praedicunt enim huius agenturae analystae "tempora difficiliora" oeconomiae Lusitanae adventura, qua re proximo (i.e. 2011) anno regimen Olisiponense cogetur, ut expensa socialia valde comminuat.

Mense Aprili alia trium maiorum agenturarum aestimatoriarum mundi, Standard & Poor's (S&P), deminuit suam Lusitaniae aestimationem duobus item punctis, usque gradum A- cum prospectu negativo. Multi negotiatores timent, ne Lusitania sequatur exemplum Graeciae, cuius aeris alieni aesimationem usque 'gradum sordidum' (Anglice junk level) primum S&P ac deinde, duobus mensibus interiectis, Moody's deminuerat.

Nunc tamen, aliter ut in casu Graeciae, panica collocatorum pecuniae non erat tam magna, nam similis sententia Moody's magna e parte a mercatoribus expectabatur. Primo reflexu nummus euro sui valorem erga dolarium USA amiserat, postea tamen magnam partem iacturae recuperavit.

"Multo peius esset, si S&P (denuo) aestimationem Lusitaniae demitteret" - commentatus est pro agentura diurnaria Reuteriana Sean Maloney, analyticus argentariae Nomura. Lusitanus autem minister oeconomiae commoratur in 'prospectu stabili' novissimae aesitmationis, qui prospectus significet oeconomiam huius terrae non appropinquare tam vehementem mutationem rerum.

Omnes, qui oeconomiae Europaeae veram condicionem cognoscere cupiant, expectant diem 23 Iulii, cum Commissio Europaea divulgatura est effectus 'probae duritatis' maximarum argentariarum Europae. Maximi momenti erunt effectus huius probae peractae in regione Mediterrano, ut appareatur, utrum aliae praeter Graeciam terrae sociae Unionis Europaeae crisi oeconomica gravi affligantur. Negotiaters timent imprimis de Lusitania, Hispania, Italia necnon, praeter regionem, Hiberniam (Irlandiam).

Scripsit iconoclastes.blog.onet.pl