De oppositore Tibetano in vinculis

In Xinjiang, Sinensi regione occidentali, Karma Samdrup (quem in imagine adposita conspicis) rerum naturae strenuus defensor Tibetanus ad quindecim annorum captivitatem condemnatus est ab iudicibus Sinensibus: qui accusatur sepulchrorum violationis et ornamentorum inde ablatorum venditionis. Cuius uxor constanter accusationes negat, adfirmans virum in carcere verberatum, deinde fictis indiciis condemnatum esse: qui siti fameque excruciatus est, ut ad scelera confitenda cogeretur. Ne interpres quidem in tribunali aderat, ut iudicis verba a reo intellegerentur. Karmae patronus dixit Tibetanos nefas habere tam feretra vel cadavera inhumata attingere quam res e sepulchris effossas auferre.

Karma narratur clarissimus vir esse Tibetanus recentibus annis in vincula coniectus. Mercator est rerum antiquarum Tibetanarum et tantum pecuniae ita comparatae occupavit ad excelsas planities Tibetanas servandas, ut anno MMVI reti televisifico publico Sinensi salutatus esset ut "philanthropus optimus". Eius sodales referunt re vera Karmam punitum esse quod fratres suos hodie captivos palam defendisset, qui fere exstinctarum bestiarum venatores detulissent. Quinquaginta oppositores Tibetani etiam nunc in custodia habentur, post perturbationes quae anno MMVIII ante Olympia Pechinensia factae sunt.

Scripsit Herimannus Novocomensis