INSTATNE ALTERA PHASIS CRISIS OECONOMICAE?

Fora denuo cadunt

Indices bursarum totius mundi die Martis decidebant propter timorem difficultatum zonae euronis ac nuntios de bello imminente in paeninsula Coreana. Maxime valorem amiserunt argentariae. Analytici timent, ne altera phasis crisis oeconomicae adveniat.

Timor res oeconomicas Europae pessum iri aggravescit nuntiis modo allatis de argentaria centrali Hispanorum, quae coacta sit pecunia adiuvare huius terrae argentariam privatam regionalem nomine Cajasur. Accedit quod peiorem aestimationem oeconomiae Hispanorum modo divulgaverit Internationalis Fundus Monetalis (IMF). Rebus ita stantibus multi negotiatores sollicitantur, putantes difficultates Graecas iam propagari in alias terras Europaeas maximo aere alieno laborantes (quae, praeter Graeciam et Hispaniam, sunt Lusitania, Hibernia et Italia).

De Corea Septentrionali autem nuntiatur huius terrae copias in statum vigilem adductas esse. Praeterita septimana Austrocoreani accusaverunt suos concives Boreales reos esse ictus torpedinis, quo mense Aprili demersa erat navis longa Coreae Meridonalis.

Pretia titulorum negotiationum et in Europa et in USA die Martis amiserunt inter 2 et 3,5 centesimas valoris. Spatio totius praeteriti mensis index FTSE 100 maximarum centum negotiationum Britannicarum decidit circiter decem centesimis.

"Res denuo non videntur stabiles" - commentatus est statum oeconomiae mundanae peritus radiophoniae BBC Robert Peston. Qui addidit se praecipue sollicitari condicione Hispaniae. "Numquam id secretum fuisse argentarias Hispanas pecuniam multam posuisse in (crisi maxime afflictam) rem hypothecariam" - dixit ille.

Scripsit iconoclastes.blog.onet.pl