Decem milia milionum dollariorum, ut Haitis restituatur

Novi Eboraci donatores convenerunt, qui rempublicam vehementi terrae motu quassam restituere deliberaverant. Undesexaginta nationes aliaque instituta pollicita sunt se summatim decem milia milionum dollariorum pro Haitis incolis collaturos esse: argentaria Interamericana MMCC, Venetiola MMC, USA MC, Unio Europaea MDC miliones donabunt. Putant studiosi proximo decennio fere XII milibus milionum dollariorum opus esse ut domus scholae nosocomia tribunalia restituantur; neque hoc satis erit, nisi corruptela et latrocinium evanuerint neve provinciis potestates tributae erunt usque ad hunc diem Principis Portu tantum collectae. "Tantum pecuniae - ait ONUs secretarius Ban Ki-Moon - eget Haitis, ut radicitus renovetur!". Inscriptio interretialis creabitur, ubi cotidie tam accepta quam data publicabuntur. Consilio restitutionis Wilhelmus Clinton praeerit, qui olim Civitatum Ameircae Unitarum fuit, cum Haitianorum praesidenti Joanneo Maximo Bellerive, qui ambo magna auctoritate gaudent.

Scripsit Herimannus Novocomensis