Res novae in Hibernia septemtrionali

Protestantes et catholici, qui communiter Hiberniam septemtrionalem dominantur, post arduas pactiones rationem aequiorem regionis regendae constituerunt. Democratica Unionis Pars (DUP) et Nos Ipsi (Sinn Fein) concorditer renovationem et custodiae publicae et iurisdictionis confecerunt qua aliae potestates ex regimine Londiniensi Belfastum afferantur. Proclamavit minister primarius Petrus Robinson, unionem obtentam "signum esse certissimum, nos numquam ad pristina mala tempora reversuros esse". Nihilo minus Petrus Robinson eiusque vicarius Martinus McGuinness invitationi non obtemperaverunt sibi invicem manum destringendi.

Minister primarius Britannicus Gordon Brown (quem cum Petro Robinson in imagine aspicis) de nova aetate locutus est: "Nos ultimum caput concludimus diuturnae inquietae historiae et novam aetetem Hiberniae septemtrionalis coepimus." Ille, cum collega Hibernico Briano Cower Belfasti convenerat, gravem renovationem nuntiaturus.

Scripsit Herimannus Novocomensis