Auxilia imparia

Sub schola terrae motu diruta sepulti sunt centum pueri et puellae: hic est ultimus funestus nuntius Leogane, ex Haitis remota urbe quo nulla auxilia hucusque pervenerunt. Interea Principis Portu post direptiones et violentiam ab rectoribus noctu deambulare interdictum est: nam opitulatoribus cibaria et medicamenta egenis suppeditare propter desperatorum facinora plerumque non licuit. Deest aqua, desunt latrinae, increscit contagionum periculum.

Secretarius Ordinis Nationum Unitarum Ban Ki Moon ex Consilio Securitatis MD custodum publicorum et MM caerolearum galearum missionem petit, non solum opis ferendae sed etiam adiutorum operae recte componendae gratia: Wilhelmum Clinton, olim USAe praesidentem, ut legatum misit qui secum aquam, cibaria, medicamenta, taedas electricas, transistores, electricae potentiae generatores aëronavi contulit. Qui cum praesidente Renato Préval conveniet de auxiliis collocuturus et civitatem vastatam peragrabit: "Meum ONUs legati - inquit - est tam nationem visitare quam cum praesidente colloqui, quo efficacius auxilium feratur." Unio Europaea MMMMCC centena milia euronum promisit; cives Europaei Haiti adhuc morantes domum reducet, Gallorum exercitu iuvante. Interea "Marium Libertas" et "Marium Nauta", naves multa milia periegetarum per aequora Caraibica transportans, ad Haitis oras appellunt ab armatis vigilibus protectae.

Scripsit Herimannus Novocomensis