Annus
2 0 1 0


De atrocissima strage Haitiana

CENTENA MILIA HOMINUM PERIISSE OB TERRAE MOTUM TIMENTUR

De atrocissima strage Haitiana

Dum condicio civitatis Haitianae in dies miserior fit, summae difficultates in miseriis sublevandis exortae sunt. Cum in regione tam invia non fieri possit, quin per aera hominibus succurratur, ea quoque ratio opis ferendae nonnumquam in irritum cadit: nam magistratus Americani nuntiaverunt aeroplana, quae in insulam profectura essent, retenta esse, quod in aeroportu Portuprincipali locus, ad quem appellere possent, non suppeditaret; praeterea benzinum deesse, quod aeroplanis reditui opus esset.

Multis igitur opitulatorum manipulis, praeterea gregibus quibusdam diurniariorum, qui in aeroportum rei publicae Dominicanae convenerant, non licuit illinc in insulam Haiti proficisci.

Quo plus auxilii ad insulam pervenit, eo maioris momenti fit, ut consilio atque ratione quadam succurratur. Ad eas res curandas Barack Obama, praeses Americanus, antecessores suos Georgium Bush et Bill Clinton iam proposuerat.

At in insula ipsa, quocumque te vertis, nihil nisi perturbatio et desperatio. Strages quanta sit, adhuc aestimari non potest. Iam de direptionibus nuntiatur. Cum superstites etiam nunc contendant, ut manibus nudis eos servent, qui ruina aedificiorum oppressi sunt, multa milia hominum sub aedificiis dirutis iacere putantur. Per omnes vias mortui iacentes conspiciuntur. Ex quo fit, ut periculum pestilentiae iam immineat.

Noctem sub divo degere homines sunt coacti, quod tentoria non suppeditant. Multi quasi amentes per vias errant. Siphonarii aut vigiles publici nusquam fere conspiciuntur.

Jean-Max Bellerive, qui regimini Haitiano praeest, dixit  plus centena milia hominum interisse; plura decena milia hominum desiderari. Numerus eorum, qui vulnerati sunt, incertus est.

Nemo scit, quot aedificia diruta sint. Magna pars substructionis commercialis deleta est. Viis ruderibus completis, aquae ductibus intermissis, vi electrica non iam suppeditante omne auxilium impediri locutrix Nationum Unitarum dixit ; eos, qui succurrerent, cum tempore certare.

Maximi esse momenti, ut iis, qui usum quendam haberent in eiusmodi rebus, quam celerrime liceret in regionem devastatam pervenire. Quod scilicet non posse fieri nisi magistratibus iuvantibus, ut qui notitiam locorum haberent, Jürgen Kunert dixit, qui pro Cruce Rubra Austriaca locutus est: “utinam ne umquam id accidat, ut sublevamenta in aeroportu maneant!”

Scripsit Volfgangus Austriacus



Retro ad:

Novissima editio
Summum paginae