IEMENIA FIT TERRA MAXIMI MOMENTI IN PUGNA CONTRA TERRORISTAS ISLAMISTICOS

Quinque duces capti

Permulta agmina biocolytarum Iemenitorum adorti sunt die Martis loca, ubi bellatores islamistici gregis Al-Qaeda latere suspicebatur. Quinque duces Al-Qaedani apprehensi et in vincula coniecti sunt.

Ictus contra islamistas latentes peracti simul sunt in tribus provinciis Iemeniae (quae terra tempore Romanorum nuncupabatur 'Arabia Felix'): Sabua, Marib necnon in urbe capitali, Sanaa. Nuntiatum est quoque de militibus agminum securitatis sequentibus Al-Qaedanos in provincia Abjan.

Al-Qaeda Iemenica conata est tempore Natalis Christi explosionem suicidialem perficere in aeronavi volanti Amstelodamia Detroit. Speculatores US-Americani suspiciunt quoque in hac terra maximam in toto orbe terrarum partem nasci tironum motus islamistici. Multi rerum Proximi Orientis periti timent Iemeniam cursu proximorum annorum fore maximi momenti theatrum belli contra terroristas mahometanos, ubi condicio gravis mox fieri possit quam in Afghanistania, Pachistania Iraquiave.

Praeteritis duobus diebus aedes suorum legatorum in urbe Sanaa ad tempus claudere decreverant, ictus suicidales timentes, regiminina USA, Britanniae et Francogalliae. Nuntiis tamen de successibus biocolytarum in pugnis contra islamistas allatis, omnes haec aedes denuo apertae sunt.

Scripsit Stanislaus Varsoviensis iconoclastes.blog.onet.pl