De labibus in Brasilia

Quinquaginta saltem homines recentissimis diebus Fluminis Januarii et in regione finitima plurimis labibus interierunt: quorum aliquot putantur periegetae fuisse, qui ex anni incipientis celebrationibus redire reputantur. Dux siphonariorum regionis illius Petrus Machado "Cum vicinia - inquit - collocuti sumus, unde censemus quadraginta saltem homines interiisse." Sumptuosum deverticulum Sankay (quod in imagine aspicitur) cum propinquis domibus ruina immani, trecenta metra lata, obrutum est: aedificii lignea fragmenta per litus et mare dispersa inveniuntur. Civitatis Fluminis Januarii gubernator Ludovicus Ferdinandus Pezao "Horribile visu! - ait - saxorum et arborum acervi plurima aedificia operiunt!". Cum pluviae finis nondum praevideatur, magis ardua adiutorum fit opera; verentur auctoritates, ut mox obruantur etiam creberrimae insulae ubi pauperes in fluxis casis misere vivunt, quae ibi "favelas" appellantur. Veneris die septem victimae in Regum Sinus provincia propter labes numerantur, Jovis die undeviginti plerumque in Fluminis Januarii suburbiis miserrimis perierunt.

Flumen Januarii = Rio de Janeiro

Regum Sinus = Angra dos Reis

Scripsit Herimannus Novocomensis