Annus
2 0 0 7


SPIEGEL ONLINE - 13

CAVE SCIURUM!

Tres homines violatos esse a sciuro

Istam bestiolam esse lepidam et nitidam et prorsus innocuam - nequaquam. Passavio in urbe Bavariae Inferioris sciurus quidam furibundus tres homines petitos vulneravit. Cuidam viro redituario demum contigit, ut refrenaret impetum istius bestiae mordacissimae.

Passavio ex urbe – Astynomi nuntiaverunt sciurum per ianuam xysti apertam in conclave insiluisse ibique manum mulieris tam vehementer momordisse, ut illa septuagenaria panico terrore correpta in viam se proriperet. Ibi demum mulieri contigit, ut bestiam quatiendo a se averteret.


Sciurus nucem rostro tenens: A redituario occisus.

Operarius structuralis 33 annos natus factus est proxima victima rosoris: qui operarius manibus bracchioque inferiore asperrimê rasîs se aliquatenus defendit. Deinde sciurus saevus aufûgit in hortum propinquum, ubi aggressus est virum 72 annos natum. Qui vir fortissimus denique istum nucum effractorem Herculi Aiacique quadamtenus similem baculo occîdit. Pathologi sedis valetudini probandae officialis, quae sita est in oppido Oberschleißheim prope Monacum, nunc perquirunt, num Passavianus sciurus furentissimus laboraverit morbo rabiei.

Hanc relationem d.13.m.Iunii a.2007 h.13.27 in periodico interretiali „Spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

 

Scripsit Nicolaus Gross



Retro ad:

Novissima editio
Summum paginae