CRATER NVGARVM MENSIS IVNII

De horologio Bushiano furibusque ingeniosis aenigma

Ut fortasse iam scis, lector care, qui nuntios nostros brevissimos per summam paginam primam "Ephemeridis" currentes certe legere soles, "secundum stationes televisificas Albanienses, tempore manus a Georgio W. Bush cum populo Tiranae [die nono Iunii] amplectendi aliquem furatum esse horologium manuale praesidentis USAe, quod eventum pelliculae [magnetoscopicae] tunc factae monstrent". Cui rei tamen Domus Alba negat, dicens ipsum Bush horologium tunc de manu sui detraxisse et in sinum camisolae posuisse.

Ego re vera nescio, quid melius: illae enim [stationes TV Albanienses] gloriantur apud eos fures tam ingeniosos habere, haec [Domus Alba] gloriam hanc iustam esse agnoscit, subauditur enim verbis eorum praesidentem bene scisse hanc terram tam ingeniosos artifices habere, voluit ergo ipse horologium manu detrahere antequam manus suas populo ad amplectendum praeberet.

Iam timeo de anulo Benedicti XVI, si quandocumque pontifex maximus urbem capitalem Tiranam sit petiturus! Sed ne nimis in alias nationes inveham, de meipsa gente iocum dicam, qui inter Germanos ante nonnullos annos currere solebat, de praeconio scilicet cuiusdam officinae periegeticae: "Ferias ubi facias nescis? In Poloniam, quaeso, venias - autocurrus tuus iam ibi adest!"

Contra praevalentem opinionem, mulieres non minus viris photographemata honimum nudatum, erotica scilicet, spectare amant - docent effectus investigationis studiosorum Instituti Kinseyanae urbis Bloomingtoniae civitatis Americanae Indiana, moderatrice doctrice Hether Rupp, quae rebus ad sexum pertinentibus ibi studet. Instrumentis accuratissimis scrutati sunt ab his studiosis motus pupularum oculorum hominum ephemerides eroticas legentium. Contra exspectationem, viri, mulieribus comparati, multo longius facies at brevius partes intimas in photographematis monstratas inspiciebant.

Saponem coffeinam continentem conficerunt inventores societatis comercialis Think Geek, qui sapo his praesertim usui esse potest, qui multo mane ad officia festinant nec tempus habent ut poculum caffei matutini bibant. Sapo nomine Shower Shock suppeditabit corporibus eorum per cutem partem quandam coffeini. Sapo hic - ut facile coniectari potest - etiam aromate coffei redolet.

Secundum consilia ministerii sanitatis, senes Britanni dementia cerebrali dolentes microcubo electronico perpetue instruendi sunt (e.g. sub cutem insuto), quem microcubum semper secum portantes, si de via declinaverint, re a consanguineis amicisque eorum comperta, ope satellitum facillime inveniri poterunt. Si autem melius 'microcubo', lector care, nomen rei, quae Anglice 'microchip' nominatur scis, celerrime editori "Ephemeridis" epistulam mittas; ego nescivi.

Quattuor homines a caniculis marinis necati sunt in maribus mundi proximo in anno et eodem tempore circiter 73 miliones caniculi a hominibus - aestimat societas cui nomen International Shark Attack File (Index Internationalis Incursuum Caniculorum Marinorum), cui sedes in urbe Mexicana Las Barrancas. Nuntius hic Buddhistis praecipue Hinduistisque horrendus!

Licentiam certamina Europaea pedifollii anno 2012 habendi parlamentarius quidam Polonus nomine Piotr Misztal magna pecunia alicui alii terrae vendere regimini suadet, nam nullo modo omnia huic rei necessaria, sicut viae modernae, tramina publica, stadia, deversoria etc., tam citissime strui in Polonia possint. Quibus curis diurnarius "Ephemeridis" aliam addere audet: certamina una cum vicina Ucraina Poloniae sunt praeparanda; nemo autem scit, utrum Ucraina tunc una fiat. Fortasse duae.

Mahatma Gandhi mortuo, neminem parem habeo, quocum de iuribus hominum loquar - dixit modestiae plenus praesidens Russiae Vladimir Putin diurnario actorum "Le Figaro", querens de statu rerum humanarum in USA (campus concentracivus Guantanamo, homines in viis vitam degentes) necnon Europa (reclamitatores a biocolytis ferociter dispersi).

Scripsit