Ianuariopoli ex urbe Brasilianâ – Astynomi indicant sacerdotem 46 (quadraginta sex) annos natum die Martis in habitaculo suo Belemensi compluribus cultri ictibus necatum esse. Brasilianus arrestatus cum interrogaretur asseverabat se ipsum necessario defendisse. In urbe Belém capite borealis Brasilianae civitatis foederalis, cui nomen est Pará, locutor astynomicus declaravit causam facinoris adhuc esse investigandam.

Iuvenis 18 annos natus secundum legem Brasilianam damnari potest ad poenam custodiae summum 30 (triginta) annorum. Primâ in interrogatione dixerat se in sacerdotem incidisse in quodam supervenalicio eundemque domum euntem comitatum esse, ut apud eum interrete pervagaretur. In habitaculo sacerdotem tetigisse alterum genu suum; cum ipse sacerdotem repudiasset, illum cultre in se invectum esse. Locum facinoris insignem fuisse vestigiis pugnae factae necnon alteram manum alterumque bracchium iuvenis suspiciosi affecta esse profundis vulneribus incisivis.

Episcopatus Trevirensis Rhenaniae-Palatinatûs rettulit sacerdotem ex mense Septembri anni proximi praeteriti laborasse in seminario sacerdotali Sancti Casparis Belemensi. Eundem ibi manendum fuisse per quinquennium. Mediatris Brasilianis nuntiatur idem Germanus iam hodie sepultum iri in urbe Belém. Orani Joao Tempesta archiepiscopus Belemensis doluit, quod commissum esset „scelus crudele".

*puer meritorius: De verbo cfr CIC.2,41,105...At vero te inquilino – non enim domino – personabant omnia vocibus ebriorum, natabant pavimenta vino, madebant parietes, ingenui pueri cum meritoriis, scorta inter matres familias versabantur.