Mulier pacificê dormitabat post autoraedae suae rotam moderatricem – motro operante, sanguine 5,28‰ (quinque – virgula – duodetriginta partes millesimas) continente imbuta. Astyphylaces Francogalli hanc autoraedariam Britannam invenerant in collibus Niciensibus.

Niciâ ex urbe Francogalliae meridionalis – Ecce mulier quae in regione Francogalliae meridionalis ripariâ autoraedam gubernaverat ebriosissima: Astynomi heri sero vespere nuntiaverunt astyphylaces eam mulierem invenisse septimanâ exeunte in sede gubernatoriâ autoraedae suae dormitantem, motro operante. Autoraeda huius Britannae 46 (quadraginta sex) annos natae prope habitaculum statuta erat in viae margine.

Autoraedariae statim fuit tradendum diploma gubernationis. Cui mox causa erit dicenda. Nam in Francogalliâ autoraedam gubernantibus nulla conceditur portio alcoholis sanguinalis nisi summum 0,5 ‰ (zerotis – virgula – quinque partium millesimarum). At illa mulier Britanna imbuta erat portione alcoholicâ decies maiore.