Parisiorum ex urbe – Masturbari minus periculosum esse quam in coeundo adhibere condomium – hoc Iohannes-Maria Le Pen primo dixerat die Iovis in foro periodici mulierum, c.t. „Elle". Eiusdem fori thema fuit: "Quid velint mulieres". Statim „Frontis Nationalis" extremae partis politicae dextrae dux atque spiritus rector a multis auditoribus Universitatis Parisinae, praesertim a studentissis, acriter vituperatus est.

Tamen hodie idem in televisorio Francogallico defendit consilium suum adulescentibus datum: Se nolle desistere ab hôc consilio. "Cum interrogatus essem, num assentirer condomia iam discipulis adulescentibus esse distribuenda, dixi: „Audi, melius illi utantur „manu militari". Quod esse „multo minus periculosum quam usum condomiorum".

Demoscopi nuntiant Iohannem-Mariam candidatum electionis praesidialis nunc esse in loco quarto. A.2002 cum idem esset candidatus praesidialis, in Francogalliâ permultae factae sunt manifestationes, quibus acerrimê repudiaretur.