Annus
2 0 0 7


Leviathan oleo plenus

Leviathan oleo plenus

Homines multi his diebus, pretio petrolei ad culmina historica crescenti, de novis alimentis ignis loquuntur, de cana scilicet sacharea aliisve plantis copiam energiae possidentibus, de vi ventorum aut marium, de reditu ad tam ultimis decennis contemnatam nihilominus puram energiam nuclearem. Plerique tamen sermonem talem pro nugis habent, credentes se semper vecturos automobilia combustibile adhuc adhibitum, petroleum scilicet, bibentia.

His scepticis usui esse videatur doceri fuisse olim tempus non tam antiquum, saeculis scilicet ab ineunte sexto decimo usque ad medium undevicesimum, cum domus totius fere orbis occidentalis, at imprimis Americae Septentrionalis, luce illuminabantur usu olei balaenarum combusti nec ununquemque tunc sibi mente fingere posse alio ignis fomite umquam usurum.

Etiam anno 1843, cum prima experimenta cum usu bituminis liquefacti perfecta iam essent, acta diurna "Nantucket Inquirer" sine misericordia irridere solebant schismaticos "foetido ac periculoso puri" faventes.

Advenit autem annus 1859, cum "colonellus" Edwin L. Drake primus homo e visceribus terrae petroleum eduxerit et omne aevum Mobydickianum subito finiturum erat.

* Eric Jay Dolin, "Leviathan: The History of Whaling in America"

Scripsit ANL



Retro ad:

Novissima editio
Summum paginae