Ortus renovatus (Ai No Yokan)

Japonia anno MMVII.

Direxit, scripsit et in scaenam reduxit: Masahiro Kobayashi, imagines curavit: Koichi Nishikubo, musicam curavit: Masahiro Kobayashi, cinema extruxit: Naoki Kaneko, partes maximi momenti egerunt: Masahiro Kobayashi (Junichi), Makiko Watanabe (Noriko), Harumi Nakayama.

Certamen cinematographicum Locarnense, quod quotannis mense Augusto in oppido Helvetico habetur, facultatem parum notis auctoribus opera sua divulgandi praebere solitum est.

Ubi decus maximum, quod Pardus Aureus appellatur, taeniae "Ai No Yokan", quod ex sermone Japonico fere ut "Ortus renovatus" convertitur, hoc anno tributum est; quod ab Japonico auctore Masahiro Kobayashi confectum est, qui fabulam ipse scripsit et in scaenam reduxit, musicam delegit partesque primi histrionis egit; quocum iuvenis mulier Makiko Watanabe totum fere onus fabulae sustinet.

Spectatores per taediosam et constantem vitam cotidianam officinae fusoriae, pauperis deversorii, mensae communis perducuntur, ubi nihil novi umquam accidit, verba absunt, asperitas tantum laboris humanitatis et amicitiae expertis sine intermissione imperat. Quid ante dies tam absurdos fuit, quid post futurum est? Junichi, viri aetate provecti, filiam adolescentem adolescens filia mulieris Noriko, quae in mensa communi cibaria operarii conficit, enecuit: quod horrendum secretum virum et feminam inrescindibili vinculo connexerunt, quapropter ipsa patrem orbatum requirere voluit. Unde odium, deinde agnitio oriuntur, obscure renovatus ortus.

Difficile spectatoribus opus, silentio et constantia imaginum et locorum praevalentibus: peritis delectis qui opera cinematographica Locarni iudicaverunt optimum visum est. Aspicite lectores - omnia intelliguntur etiam a non Japonicis, ob paucitatem sermonum - et ipsi iudicate!

Scripsit Herimannus Novocomensis