Cruentus adamas (Blood diamond)

Pellicula filmica in USA anno MMVI edita.

Direxit Edward Zwick, scripserunt Charles Leavitt et C. Gaby Mitchell. Partes maximi momenti egerunt: Leonardo Di Caprio, Jennifer Connelly, Djimon Hounsou, Michael Sheen, Arnold Vosloo.

In scaenam reduxit: Charles Leavitt; pelliculam extruxit: Steven Rosenblum; imagines curavit: Eduardo Serra; musicam curavit: James Newton Howard; scaenas effinxit: Dan Weil; vestimenta curavit: Ngila Dickson.
Produxerunt: Warner Bros. Pictures; distribuerunt: Warner Bros.

Anno undebismillesimo Daniel Archer, cuius partes Leonardus Di Caprio agit, mercennarius in Rhodesia ortus, illicite adamantas trans fines Liberiae ex Monte Leonino (Sierra Leone) evehere solitus est. Deprehensus et in vincula coniectus, Salomonem Vandy (Djimon Hounsou) cognoscit, miserum piscatorem, a seditiosis ex vico familiaque vi ereptum et invitum ad adamantas effodiendos coactum: qui palam a carceris custode accusatur, quod ingentem adamanta invenerit et abdiderit. Libertatem iterum adeptus, Daniel amicitiam coniungit cum Magdalena Bowen (Jennifer Connelly) diurnaria Americana, quacum duo viri et Salomonis familiam et pretiosum adamanta exquirere conantur. Longa (nimis spectatori longa!) est fabula, quae saevam belli violentiam, horrorem puerorum vi ad arma compulsorum, nequitiem adamantum mercatorum describit, saepe sollicitudinem et animi motum in spectatoribus excitans.

Auctor pelliculae filmicae hoc unum sibi propositum esse adfirmat, coram omnibus turpitudinem adamantum commercii deferre, quo et miseris paupertas increscens comparetur, et saevis armatis nigro alboque cutis colore potestas scelesta facinora perpetrandi detur, et armorum atque adamantum nequam mercatoribus cruore manantes divitias coacervare liceat. Quam thesin vivido et periculis pleno cinemate auctor demonstrat. Nimia tamen nonnullis videbitur profluvies machinarum scaenicarum, Acrifolii Saltus (Hollywood) modum commemorans.

Scripsit Herimannus Novocomensis