Annus
2 0 0 7


De assata bovilla (

De assata bovilla (Roastbeef)

Ecce ferculum perfacile, cuius maxime ardua pars est optimam carnem bubulam invenire.

Tibi compara dimidium chiliogramma tenerrimae pulpae bovillae aut (ad libidinem) vitulinae, parvum poculum vini albi aut rubri, olivum, sal, piper, allium, rorem marinum.

Carnem sale et pipere consperge et manibus confrica ut condimenta per superficiem absorbeantur; interea in olla calefiat olivum copiosum cum allio et rore marino. In olivum torridum caute carnem depone, dein duobus cochlearibus ita volve, ut omnia latera calore assentur. Vinum superfunde, paulo post operculum impone et per dimidiam horam circiter coque, interdum revolvens. Cave, ne nimis in olla caro maneat: aculeo puncta, usque ad finem roseus liquor inde exeat!

Demum ex olla carnem aufer et exspecta, donec tepescat: cultro peracuto in subtilia segmenta reseca, in lancem pone et sucum ex olla superfunde, cum pomis terrestribus contusis et poculo pretiosi vini rubri comede!

Scripsit Herimannus Novocomensis



Retro ad:

Novissima editio
Summum paginae