De optimo anno (A good year)

Pellicula filmica in USA anno MMVI edita.

Direxit Ridley Scott; partes maximi momenti egerunt: Russell Crowe, Albert Finney, Marion Cotillard, Abbie Cornish, Didier Bourdon, Tom Hollander, Freddie Highmore, Rafe Spall, Archie Panjabi, Ben Righton; in scaenam reduxit: Marc Klein; imagines curavit: Philippe Le Sourd; musicam curavit: Marc Streitenfeld; scaenas effinxit: Sonja Klaus; vestimenta curavit: Catherine Leterrier
Produxerunt: Fox 2000 Pictures / Scott Free

Quomodo in Angliae maxima urbe vivitur? quomodo ruri, in Gallia meridiana? uter locus felicitati aptior est? Respondet haec venusta pellicula ex fabula auctoris Petri Mayle orta quaestioni huic, et vitam pecuniae mercatorum Londiniensium, et placida rura vitibus culta Narbonensis Provinciae demonstrans.

Maximus Skinner (quod verbum ex Anglica lingua "pellis detractor" convertitur) peritissimus est in pecuniae mercimonio, sociis et inimicis invisus, squali modo acervos divitiarum colligens, iam diu oblitus pueritiae suae gratissimorum dierum: quem patruus Henricus, in Gallia meridionali vinearum dominus, de voluptate et labore vini conficiendi docere solitus erat. Inopinata senis mors Maximum in domum rusticam Narbonensem cogit: ibi pueritiae suae loca iterum invenit, memorias suaves, agricolam fidum; ibi tres mulieres cognoscit, quae suo quaeque modo vincula indissolubilia cum advena iungunt. Gallia meridiana, mitis splendida voluptaria, Maximum non amplius effugere sinet.

Nihil in comoedia inexspectatum, nihil tamen inelegans: suam quaeque persona naturam patefacit, hilaritas ex ipsarum concursu ultro saepe gignitur. Suavissima vero alliciens Provincia Narbonensis, exornatae imagini similis: spectator sese per horas duas interrogat, quidnam in vita grave sit, quid sibi acquirere operae pretium sit. Comoedia est iucunda, quam valde commendo.

Scripsit Herimannus Novocomensis