CUM OMNES DORMIUNT, COLLOCATOR AMERICANUS EMPTIONES AUDACES PERFICIT

Squalus venatur tempore malaciae

Novissimis in diebus, tempore scilicet anni cum fora mundana dormiunt, 77 annorum vetus collocator Americanus Warren Buffett, cuius res familiaris secunda esse creditur tantum illi a Bill Gates possessae comparata, inopinate nonnullos audaces contractus mercatorios perfecit, quibus sperat negotiationem suam Berkshire Hathaway aucturam.

Praeterito die Veneris Buffett nuntiavit se empturum esse 440 milionibus dolariorum divisionem giganteae argentariae Batavicae ING Groep. Eodem tempore emit ille obligationes quarundam societatum assecurationis.

Tribus diebus prius, die scilicet Natali Domini, Buffett assensus est emere summa 4,5 mld $ partem conglomeratus industrialis, quae adhuc in possessione familiae Pritzker manebat. Et nonnullis septimanis antea collocator ille Americanus intravit mercatum "obligationum sordidarum", emens sumptu 2,1 mld $ aes alienum societatis TXU, quae vim electricam praebet. At non sunt ultimo tempore crisis creditoriae in gratia collocatorum obligationes aeris alieni nec societatum assecurationis.

Nuper etiam Buffett auctus est partem a se possessam bancarum Americanarum U.S. Bancorp et Wells Fargo, emit quoque obligationes ferriviae Burlington Northern (altera longissima ferrivia in USA) necnon syngraphas CarMax, quae est maxima Americana negotiatio automobilia vetera vendens.

Omnes principales collocatores caute observant gradus Buffettianas, nam res huius milliardarii mirabiliter crescit dum aliorum chartulae cadunt. Ita syngraphae classis "A" negotiationis Berkshire Hathaway finiente nunc in anno, tam dolenter crisi hypothecaria affecto, creverunt 52 centesimis, dum index Standard & Poor's 500, quae continet quingentas maiores societates fororum Wallstreetianorum, aucta est eodem tempore solis 4,24 centesimis.

Buffett tamen negat se quoddam "stratagema Natalicium" perfecturum et tempus recentissimorum contractorum ab eo pactorum putat casu nunc, tempore "malaciae" in foribus, evenisse.

- Nullum erat nobis consilium hoc tempore anni aliquid speciosum perficere - Buffett respondit telephonice a diurnario "New York Times" rogatus.

- At deerat simul ulla limitatio agendi - addidit modice.

Tempore huius telephonematis Buffett dixit se putare crisin creditoriam procul a fine esse, seipsum consilium cepisse de ipsius negotiatione creanda, quae emitteret obligationes ad mercatum assecurationis spectantes. Hoc fecisse admittit, ne in "tricas aliorum" caderet.

Die 30 Septembris res familiaris Buffett aestimabatur aequari 78 miliardis dolariorum. Analystae credunt ad novos emptiones ei in promptu adesse circiter 47 miliarda USD.

Scripsit Stanislaus Tekieli