Annus
2 0 0 7


26

REGINA PULCHRITUDINIS

Dominula Francogalliae eiusque photographemata odiosa

Ante duas septimanas Valeria (Valérie) Bègue electa est Regina Pulchritudinis - num eidem hôc honore iam nunc est cedendum? Iuvencula 22 (viginti duos) annos nata opprimitur propter imagines lascivas. At Dominula Francogalliae intimo ex corde affirmat: „Equidem non sum puella impudîca".

Parisiorum ex urbe – Haec Venus altera ex Insulâ Reunionis oriunda ante tres annos ad vestium commendationem propagandam siverat se in natabulo photographari cruci impositam tamquam Iesum crucifixum. De hac re indignatissima Genovefa (Geneviève) de Fontenay, praeses Commissionis Dominulae Francogalliae: "Istud" inquit „est absolutê improbabile". Fieri non posse, ut ipsa in publicum prodiret „cum tali mulierculâ". „Oportet" Genovefa inquit „aut ista statim honore cedat aut nos cogamus, ut cedat".


Ecce Valeria Regina Pulchritudinis: "Nos omnes viventes peccamus. Equidem mutata sum."

Die Veneris decernetur de fortunâ Dominulae Francogalliae anni 2008. Genovefa autem die Mercurii dixit consultationis etiam participes fore Endemol negotiationem productionis, quae hoc certamen disponeret, et Societatem Dominulae Francogalliae et ipsam Valeriam. Si Valeria honore suo regali orbata erit, nova Dominula Francogalliae fiet Vahinerii Requillart puella 19 annos nata, quae etiam non est oriunda e patriâ Gallorum, sed e Neo-Caledoniâ insulâ Maris Australis remotissimâ.

Valeria autem lamentans: "Aliquis" inquit „me prodidit". Illa photographemata esse imagines probandi causâ factas, non publicatas, se pro illis numquam accepisse pecuniam. Puella nigris capillis insignis: "Fui" inquit „modella modaria*, habui annos undeviginti. Confiteor me peccavisse peccatique me paenitere amariter. Nos omnes viventes peccamus. At mutata sum. Ego non sum puella impudîca".

Imagines, quae nonnullis videntur esse blasphemicae, sed a Valeriâ dicuntur numquam esse publicatae, nunc publicatae sunt in periodico, c.t. „Entrevue". In eodem periodico monstrata etiam sunt alia photographemata eiusdem seriei, in quibus Valeria lascivê lingit iogurthum e pocillo effusum. Quae imagines non sunt alius generis ac solita photographemata in commendatione commerciali usitata. At imprimis Genovefa erat consternatissima de Valerianâ imitatione crucifixionis. Omnis candidata certaminis Dominulae Francogalliae oportet primum scripto affirmet se numquam sivisse ipsam photographari impudîcê.


"Non sum puella impudîca."


Consternatissima erat Genovefa de positione crucifixionis.


Valeria iogurthum e pocillo effusum lingit lascivê.


Ecce Genovefa (Geneviève) de Fontenay arbitra elegantiarum morumque castigatrix severissima –: "Oportet ista statim honore cedat aut nos cogamus istam, ut cedat."

In Insulâ suâ patriâ in Oceano Indico sitâ Valeria a permultis hominibus est adiuta. Politici compatriotae vituperatoribus obiecerunt odium phyleticum*. Assectatores Dominulam Francogalliae recenter coronatam in insulâ receperunt tamquam reginam necnon manifestaverunt se Valeriae esse consortes fidelissimos.


Gilbertus Aubry episcopus Insulae Reunionis

Gilbertus autem Aubry, episcopus Insulae Reunionis, dixit quidem se esse „consternatum" de photographemate crucifixionis, quo „laederetur fides Christianorum". Tamen episcopus noluit assentiri iis, qui postularent, ut Valeria cederet honore Reginae Pulchritudinis.

Hanc relationem d.26.m.Dec., a.2007, h.15.21 in periodico interretiali „Spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae