ANTE DIEM NATALEM EST TEMPUS TABERNAS VISENDI

Quomodo obsonamus?

Tempore ante Diem Natalem Domini omnes fere cives terrarum occidentalium obsonatum eunt, modo dona natalicia propinquis danda ementes, modo escam, qua diebus festivis deinde epulentur. Hac occasione diurnarii ephemeridis International Herald Tribune de modis obsondandi rogaverunt Iohannem-Lucam (Jean-Luc) Mauduit, qui praeest divisioni agenturae aestimatoriae ACNielsen, quae divisio investigat mores emptorum in Europa.

Statu decennis praeteritis comparato, solvent Europaei maiorem aut minorem salarii partem pro esca?

Esca, potiones, nitelae, re vera omnia, quae in pantopolio invenias, decursu temporis constituunt minorem minoremque partem salarii medii statistici civis Europae. Decennio 1960-69 in Francogallia haec res emebantur 26% (vicenis senis centesimis) intermedii salarii, cum nunc tantum 16% (senis denis centesimis). Hodie Europaei maiorem quam antea partem salarii solvere solent ad aedes emendas ornandasque, voluptates peragendas, sui valetudinem curandam necnon emenda instrumenta telecommunicativa. In tota Europa Occidentali coniunctio observatur inter altitudinem generalis productus domestici (GDP) et partem expensorum, quae spectat ad escam: ubi scilicet GDP est maior, ibi minor pars salarii datur victualibus emendis.

In pantopoliis sive hyperagoris solemus obsonare aut potius in parvis tabernis prope domum?

Anno 1980 obsonatus in pantopoliis constituit 13% (ternas denas centesimas) omnium emptionum nostrum, nunc autem 36% (tricenas senas centesimas). Causa principalis huius rei sunt ipsa pantopolia, quae multo maiora fiunt in annos, nunc saepissime superficie maiore 2.500 metris quadratis. Adsunt certe etiam multo crebriora hodie pantopolia quam olim, sed hac in re ad finem verisimiliter perducti sumus, nam multis in terris ob leges oecologicas vix alicubi liceat pantopolium novum struere. Maxime in novissimo decennio populo grata facta sunt pantopolia merces venum praebentia pretio remisso, ut sunt duo huius generis maximi complexus mercatorii Aldi et Lidl, ambo e Germania oriundi. Qui complexus non tantum sunt "viles", sed etiam admodum parvi, pantopoliis eorum circiter 500 metrorum quadratorum quodque - talia minus monstruosa pantopolia facilius est quoque in media urbe ponere, ergo propius emptoribus. Quod multis est maximi momenti, scilicet non debere autoraeda per totam horam obsonatum vehi.

Quod genus escae fit nunc maxime populare?

Certe esca, ut dicunt, 'organica'. Emptores putant eam salubriorem esse escae, quam avi nostri comedere solebant, minus cholesterolii continentem. Agitur de talibus rebus ut margarina, priobioticis sive 'bacteriis amicis', quae iogurtha continent necnon adipibus omega-3, qui adsunt piscibus marinis. Omnes quaerunt etiam his temporibus victualia quam recentissima.

Quid de potionibus?

Per totum orbem terrarum crescit gratia cerevisiae et non-alcoholicarum potionum cum carboneo dioxydato. In Europa etiam florere nunc videntur mixturae (gallicaudae) dulces sucorum pomorum cum potionibus alcoholicis, ut aqua vitae. Sed anno 2006 ambo genera potionum minus solito emebantur, quod phaenomenon etiam effectus esse potest petitionis "annonae salubrioris".

Scripsit Stanislaus Tekieli