Coloniâ Agrippinâ ex urbe – Facinus sanguinolentum praedispositum erat factum iri die Martis – id est die tragoediae Emsdettensis anniversario, in qua anno proximo praeterito cursor quidam amucianus 18 annos natus primo 37 homines vulneraverat, deinde ipse sclopetando se necaverat. Duo discipuli, 17 et 18 annos nati, in Gymnasio Georgii Büchneri commissuri erant facinus simile. Haec hodie nuntiata sunt ab astynomis Coloniensibus.

Norbertus Wagner, dux directionis criminalitatis, vespere diei Dominici rettulit discipulum 18 annos natum confessum esse se voluisse homines vulnerare et interficere et deinde sibi ipsis mortem consciscere.

Discipulus 17 annos natus illius coniuratus iam die Veneris ipse se interfecerat, sicut hodie innôtuit. Idem enim cum accepisset astynomos rem indagare, tramini transviario se obiecit. Paulo post mortuus est in nosocomio.

Condiscipuli in paginâ interretiali pueri 17 annos nati invenerant photographemata multicidii a.1999 in Americanâ scholâ superiore Columbinâ facti. Deinde die Veneris factum erat colloquium inter hunc discipulum et directores scholae et astynomos.

Tum puerum 17 annos natum causam photographemata inserendi attulisse publicam facinoris illius vituperationem. Colloquio autem cum astynomis facto eundem visum esse intellegere, hac re ipsissimâ talia facinora foveri, et assensum esse se illas imagines e paginâ suâ interretiali sublaturum esse.

Brevi post eundem iuvenem, qui describeretur esse tranquillus et non notabilis, se ipsum obiecisse tramini transviario, ut se necaret. Deinde astynomos rem investigantes invenisse amicum mortui 18 annos natum suspiciosum.

Magistratûs cum habitaculum perquirerent, invenêrunt pistolia pneumatica et duo arcuballistas necnon indices nominum magistrorum et discipulorum. Iuvenis 18 annos natus, quem complicem fuisse verisimile est, dicitur pressus esse difficultatibus scholaribus necnon a condiscipulis molestatus (molestare i.q. Theod. „mobben", Angl. to bully).

Minae facinorum amucianorum his diebus saepius factae sunt. Astynomi urbis Gütersloh die Veneris rettulerant discipulam quandam scholae universalis 16 annos natam secundum sui ipsius verba in dialogêo (i.e. chatroom) discipulorum legisse minas contra scholam factas ideoque astynomos certiores fecisse. Die Iovis propter timorem cursûs amuciani imminentis clausa est schola quaedam Mogontiacensis, postquam tale facinus in interreti est annuntiatum.

Etiam in Syke oppido Saxoniae inferioris prope Bremam sito astynomi indagaverunt, cum mâne diei Iovis in scholâ professionali eiusdem oppidi in pariete lavatrinae verba essent lecta: „Ego faciam cursum amucianum d.20. m.Nov." Astynomi autem re indagatâ concluserunt hanc annuntiationem non esse admodum periculosam.

In Finniâ d.7. mensis Nov. cursus amucianus erat factus. Discipulus 18 annos natus octo homines seque ipsum pistolio interfecerat. Qui habitus erat pro homine segregi et solitario, qui in scholâ ab aliis molestaretur. Astynomi putant eundem multicidam consilia sua cursûs amuciani faciendi annuntiavisse in statione interretiali, quae appellatur YouTube.