SPIEGEL ONLINE: Conflictus Burmensis potestne solvi sine Sinensibus?

Sandschneider: Non, certê solvi non potest sine illîs. Burma ad Sinas maximê valet ratione securitatis et oeconomiae. Scilicet haec regio aliquatenus valet etiam ad Indos et Thailandianos, sed non tanti quanti ad Sinenses.

SPIEGEL ONLINE: Quatenus Sinensium interest valere ad Burmam terram sibi propinquam?

Sandschneider: Imprimîs gubernatio Pechinensis in Burmâ eget stabilitate. Sinensibus Burma cum sit porta, qua veniant ad Oceanum Indicum, valet ad rem militarem et oeconomiam. Porro ibidem sunt fontes energiae. Necnon provinciis Sinarum austro-occidentalibus, quae in periculum veniunt, ne priventur augmento oeconomico terrae universo, Burmani sunt consortes commerciales permagni momenti. Ex alterâ parte gubernatio Pechinensis incommodatur malîs rebus de Burmâ nuntiatis, quia eaedem recidunt in Sinas. Hoc est dilemma.

SPIEGEL ONLINE: Timentne Sinenses de famâ suâ?

Sandschneider: Aliquatenus timent Sinenses. Iidem enim cum ludos Olympicos sint disposituri, nolunt iterum sibi famam contrahere adiuvandi regiminis iniusti, sicut Sinensibus nuper accidit quoad Sudaniam.

SPIEGEL ONLINE: Quid Sinensibus accidere possit casu pessimo?

Sandschneider: Si nationes appellentur, ne participent ludos Olympicos, Sinensium fama valdê obscuretur....

SPIEGEL ONLINE: ... sed nemo serio cogitat hoc facere – quod etiam scit gubernatio Pechinensis. Nonne Sinenses sibi videntur quadamtenus inviolabiles?

Sandschneider: Licet sic sentiamus, bene. At tamen gubernatores non nihil curant, occidentales quid cogitent de Sinîs. Accedit alia res: Imagines monachorum manifestantium displicent gubernationi Pechinensi, praesertim cum eaedem moneant de problematîs Tibetanîs. Itaque diurnarii Sinenses hôc tempore perpauca tantum nuntiant de Burmâ.

SPIEGEL ONLINE: Nonne gubernatio Pechinensis dirigit iuncturam militarem Burmanam?

Sandschneider: De hac re cautê iudicare velim. Sinenses ibi multum valent, sed – similiter ac in Coreâ Boreali – nequaquam scimus, num Sinenses teneant regimen Burmanarum rerum omnium. Hoc est valdê obscurum. Sed e decenniorum praeteritorum dictîs factîsve politicîs clarê apparet Sinenses malle agere cum iuncturâ militari quam cum quibuscumque hominibus democraticîs. Secundum sententiam quae est: ‚Praeferimus diabolum nôtum ignôto Beelzebub.’

SPIEGEL ONLINE: Occidentales postulant novas sanctiones (sc. quibus Burma excludatur a mercatu aliisve relationibus internationalibus, adn. interpretis). Ut omittatur efficacia – suntne tales firmae stabilesque?

Sandschneider: Responsio est – ut semper – negativa. Quia praeter Sinas etiam India et Thailandia non sequerentur tales sanctiones. Necnon sunt nonnullae negotiationes occidentales, quae per canales quosdam commercium habeant cum Burmâ. Itaque UNO in hac re prorsus est inops. Omissâ vi symbolicâ his annis praeteritis neminis serio intererat hanc rem tractare. Unica ratio verê efficax nescio an esset interventio militaris, sed talis ratio a nemine memoratur necnon re ipsâ excluditur. Accedit quod annis praeteritis manifestum erat etiam egestate publicâ exortâ Burmanae iuncturae militari quoquomodo semper contingere, ut satis extorqueat e populo suo. Necnon sanctionibus fieret, ut populus eo magis pateretur.

SPIEGEL ONLINE: Quae praedicis factum iri diebus proximis?

Sandschneider: Sinenses sperant rem Burmensem mox factum iri claram, sine magnâ effusione sanguinis. Hominesque ceteros deinde mox se conversuros esse ad aliud thema Burmam oblîtos.