Lubecâ (Lübeck) ex urbe – Magistratus astynomus pensionatus a iudice provincialis iudicii Lubecensis dictus est facinore conatus esse auctoritatem suam intra familiam servare. Testes rettulêrunt eundem virum a filio 22 (viginti duos) annos nato iterum iterumque vituperatum esse propter modum suum educandi. Ante facinus cruentum d.24 m.Oct. a.2006 factum patrem per annos rixatum esse cum filiis filiabusque.

Pater duodecim suos filios filiasque persaepe mulcaverat propter delicta minoris momenti causamque poenae explicuerat verbis quibusdam Veteris Testamenti. Religionis causâ filiis suis adulescentibus interdixerat, ne participarent convivia iuvenum. Necnon strictê vetuerat ante connubium rationem contrahere cum altero sexu. Cum filius natu maximus amicam exoptaret, pater ei suaserat, ut Deum oraret virginem sibi dandam. Iudex causam iudicii explicans dixit iuvenem istis methodis educandi rigidis et fidei patris religiosae partim simplicissimae refragatum esse; hoc filio fuisse perniciei.

Reus ipse confessus est se post rixam vehementem sumpsisse maximum cultrum coquinarium, quem inveniret eodemque summâ vi filium a tergo percussisse. At iudex, quod reus contendit se hôc facinore filium impedire voluisse, ne, sicuti minatus esset, aliquam puellam constupraret, non habuit pro causâ verâ, sed prorsus praetextâ. Omnia familiae membra scivisse filium, cum diceret a se „virginem vitiatum iri", nihil voluisse nisi patrem provocare. At reum voluisse filio defungi, quia idem non iam vellet patri oboedire.

Iudex hac poenâ constitutâ secutus est actoris publici petitionem. Defensor autem, qui postulaverat custodiam perenni minorem, annuntiavit revisionem.