Sub communismo obdormiit, sub democratia excitatur.

Post coma diuturnum, quo per annos undeviginti captus omni conscientia orbatus manserat, excitatus est Varsoviae Jan Grzebsky Polonus, traminum ferriviariorum auriga, cui cum operam daret anno MCMLXXXVIII propter gravissimum capitis ictum a medicis nulla spes salutis data erat: qui per triennium tantum, si omnia optime evenerint, insciam vitam corporis sibi servare potuerit. Uxor tamen Gertruda viro suo salutem restitutum iri sine intermissione sperare perrexit, aegri corpus cotidie revolvens ne ulceribus cubitantis cutis afficeretur.

Cum demum die XII mensis Aprilis anni MMVII excitatus est auriga, omnia radicitus iam commutata erant: obstupescens didicit aegrotus ducem Woiciech Jaruzelsky patriae suae non praeesse, Johannem Paulum II non amplius vivere, Lech Walesa societatem Solidarnosc non ducere, Foedus Varsoviense evanuisse.

"Cum in coma cecidi - inquit - Varsoviae theam tantum et acetum emere licebat, caro certis tantum rationibus comparari poterat, multitudines benzini emptorum congregabantur; nunc autem merx quaevis abundat, nonnulli telephono mobili praediti per urbem ambulant!" Quattuor filii interea Jan Grzebsky nuptiis celebratis undecim nepotes genuerunt. Propinquitatem vero familiae suae se denuo sensisse confirmat aegrotus: se verba audiisse et intellegisse sed nullo modo respondere potuisse.

Simillimum est casus huius fortunati fabulae, quae in pellicula filmica "Goodbye Lenin", Berolini sita, narrata est: hic tamen res fabulam superaverunt!

Scripsit Herimannus Novocomensis