Mosquâ ex urbe - "St, loquere submissê", Alexander susurrat. "Hîc iam ubique sunt cuticipites*". Alexander sudorem a fronte deterget, digitosque depsere non desinit. Iterum iterumque îdem alumnus academicus 23 annos natus sollicitê circumspectat. Qui timet. Timet, ne concîdatur, cum sit cinaedus.

"Pereant cinaedi!" et "Mosqua non est Sodom!" nunc foris in viâ clamitant calvi Russi neonacistae necnon assectatores Ecclesiae Orthodoxae radicales. Qui annuntiaverunt se vias Mosquae „purgaturos" esse ab Alexandro aliisque cinaedis, qui hodie volunt manifestare contra homophobiam et discriminationem cinaedorum socialem.

Unus e zelatoribus religiosis: "Isti" inquit „sunt degenerati, non iam sunt homines. Isti non iam in homines mutabuntur nisi se abdicaverint peccato suo". Îdem zelator eiusque commilitones barbati aspectum praebent minacem, vestibus nigerrimis, emblematibus pectoralibus, vastis caligis pugnatoriis. Qui orthodoxi radicales benedicuntur a sacerdote, deinde incipiunt cantare cantûs chorales, quasi pompae religiosae participes cruces atque icones prae se ferunt – se profectos esse ad proelium inter bonos et malos faciendum putantes.

"Actiones satanisticas" Georgius Luschkow burgimagister Mosquianus appellavit studia, quibus activistae homosexuales vellent in urbe Russiae principe pompam ducere cinaedorum tribadumque. Îdem burgimagister interdixit, ne haec pompa fieret - sicut anno proximo praeterito. Tamen etiam hôc anno cinaedi in viam prodiêrunt. Deinde pompa a manifestatoribus contrariis nationalisticis saevâ cum violentiâ est distracta, multi participes sunt concîsi.

Illo tempore etiam erat afflictus Volcerus Beck delegatus parlamenti Germanici Prasinus. Qui a Russis neonacistis erat violenter petîtus. Adversus hunc impetum in se factum Volcerus etiam hôc anno iter fecit Mosquam. Qui vult persuasionem suam manifestare: "Oportet nos dicamus Russis politicis quam clarissimê Europaeam conventionem iurum humanorum, cui Russia quoque subscripsit, valêre ad omnes. Etiam ad cinaedos atque tribades."

In plateâ, quae ex adverso administrationis urbanae sita est, complures centuriae congregantur cuticipitum orthodoxorumque fundamentalistarum. In camisiâ t-formi alicuius neonacistae leguntur verba, quae sunt: "Nos debemus protegere vitam liberorum nostri alborum futuram". Iisdem neonacistis, cum non impediantur, adversus multitudinem astyphylacum contingit, ut se intermisceant aliquot quinquaginta activistis motûs cinaedorum, qui venêrunt, quamvis manifestatio esset prohibita. Deinde cuticipites vexillîs arcûs caelestis dereptîs in manifestatores invecti eosdem mulcant, concîdunt, conculcant.

Alexander autem stat in viâ Twerskajanâ, circa eum nationalistae radicales rugiunt rhytmicê: "Russia vacet cinaedîs!". Alexander reclamat: "Russia vacet homophobiâ!". Tres cuticipites in Alexandrum irruunt eumque concîdunt. Prostratum conculcant. Sero demum astyphylaces interveniunt.

Boris Dittrich, observator organisationis iurum humanorum, quae appellatur „Human Rights Watch": "Astyphylaces" inquit „non tutantur activistas et manifestatores. Iidem admittunt commisceri greges inter se adversos, mihi videntur hŏc admittere consulto".

Alexander deterget ôs suum sanguine oblĭtum. Amici conantur eum servare a novis impetibus. "Heus turturilla**, placuitne tibi? Vin’ iterum vapulare?", illi Alexandrum inclamant, qui modo ei vim attulêrunt – et qui adhuc liberi stant duobus metris ab eo remoti. Fundamentalistae autem Ecclesiae orthodoxae iterum incipiunt cantare cantum choralem. Alexander adhuc humi iacet prostratus, cum vir quidam aetate provectus capite flexo eum despicatus exspuit et maledicit: „Ecce istum! Apparet istum non esse hominem."

_________

*cuticeps, cuticipitis m. skinhead.
**turturilla, -ae f. pathicus, cinaedus mollis, effeminatus, muliebriter se gerens. cfr SEN.ep.96,5.