Si thema est parum distinctum, necesse est verba sint eo magis perspicua. Francus Plasberg moderator "Hoc nunc sonat" aliquo momento colloquii inquit „quasi dicamus, qualis sit bona fututio, qualis mala". Antea Ingo Appelt comicus televisorius conatus erat explicare, quare ipse actum liberandi perpetrasset decennio ante in emissione televisoriâ ante telecameram iterum iterumque dictitans verbum futuendi - cum e contrario nunc Sido comicus rapianus* populare „Canticum pedicandi" cantans êderet sordidum figmentum, quo contemneretur dignitas humana.

Heri mox apparuit sat difficile esse diiudicatu, in actionibus venereis ostentandis quomodo discernenda essent licita ab illicitis. Plasberg emissionem praefatus erat verbis ipsis praefandis, q.s. "Heri homines indulsêre lusionibus convivalibus**, hodie veneri gregali***", deinde convivis erat explicandum, quatenus societatis pornographizatio, quae tunc temporis saepe tractatur, noceret moribus venereis hominum, praesertim iuvenum.

Colloquii participes erant vehementer varii: A sinistris sedit quadamtenus inhabiliter Axelius Schaffrath, lobiarius industriae venereae, qui etiam innotuit coniunx Ginae Wild actricis quondam eroticae et locutor nundinarum „Veneris", in quibus venalia prostant crepundia adultorum. Idem Axelius studuit auditoribus persuadere pornographiam esse modum vivendi („Lifestyle"). A dextris Regina Schwarzhoff, praeses sodalicii parentium Rhenaniae-Vestfaliae necnon mater triplex, indignata est de omnibus limitibus pudoris sublatis deque „bonis occidentali-christianis magis magisque amissis".

Inter illos extremos sederunt tres convivae thema considerantes ratione potius pragmaticâ: Praeter Ingonem Appelt ("Ceteri ne fiant peiores quam ego") et Novam Meierhenrich moderatricem teleprogrammatis „Viva", in cuius emissione "Are U Hot?" („Fervesne?") iuvencularum vesticulis bicinianis indutarum formae mensuraeque aestimantur, etiam collocutus est Valterus Wüllenweber, auctor periodici „Stern", qui nuper pro symbolâ scribendâ perquisivit mores venereas adulescentium, qui otiantes se gerunt exemplum pornocinematis imitantes. Exceptâ locutrice parentium Rhenano-vestfalicâ, quae rigidâ mente respuebat omne genus veneris illustratae, qua excitarentur, praesertim in pueris, actiones biologicae, quae sic quoque essent sat difficiles, ceteri collocutores noluerunt pornographiam condemnare per se.

At deinde res facta est verê difficilis et intricata. Quale est pornocinema bonum, qualenam malum? Valterus Wüllenweber in erotopoliis "pluteos perlongos faecalium spurcitiis completos" inveniri indignatus parentibus sollicitis suasit, ut eosdem pluteos aspectarent, ut acciperent, quales res vim haberent ad liberos suos. Simul Valterus defendit imagines eroticas, quod essent „delectamentum et bonum cultuale". Idem diurnarius pornographiam cum viticulturâ comparans postulavit, ut constituerentur „mensurae qualitatis".

At si tali modo de ipsis gustibus disputatur, disputatio vertitur ad incertitudinem incommodam: Pornographia fit, si unus aut complures homines actionem perpetrant veneream, ut libidinem excitent unius aut complurium hominum. Utrum hoc faciant in Acropoli vestibus historicis induti an illoti in aliquibus cavernis hypogei Neo-Coloniensibus, primo non magni rêfert. Plurimum autem rêfert, num actio venerea, quae cinematographatur, reverâ fiat voluntariê. In hac re autem est ambiguitas verê periculosa. Nam mulier iuvenis, cui semper semperque audiendus est cantus veneris gregalis rapianus a Bushidone**** musico rapiano cantatus necnon in telephonis mobilibus sociorum sui spectandae sunt scaenae veneris gregalis, - num eadem mulier reverâ agat voluntariê, licet addubitari.

Praeterea corpus femininum mediatris fit accessibile non venere gregali demum in scopocinematibus Bushidonianis simulatâ. Licet in hac re accusare etiam editores spectaculorum, quae videntur esse multo minus notabilia - e.g. illius Novae Meierhenrich spectaculum carnale "Are U Hot?". Licet moderatrix sentiat in hac emissione non plura spectari posse carnalia quam in unoquoque litore, tamen dubium est, num oporteat nullas qualitates mulierum aestimare nisi cinctûs mammarumque amplitudinem et oculorum lascivitatem; praesertim cum eaedem aestimentur a H.P. Baxter, qui est lenoniae musicae techno-electronicae comparator et gregis musici „Scooter" cantor principalis pseudochrysocomus*****. Neque in hac re multum prodest Meierhenrichiam se ipsam eo excusare, quod affirmat in emissione suâ non solum iuvencas sed etiam iuvencos ostendere corpora sua.

Quacumque ratione homines huius colloquii pornographici televisorii non semper convenientis participes debuerunt ex se quaerere, quatenus ipsi curent professionibus suis, ut stimuletur hominum libido. Necnon denique etiam ille Wüllenweber auctor ipsius „Stern" periodici a Plasberg monitus est anatomiae femininae, quanta appareret in quibusdam imaginibus eiusdem periodici, pro quo scriberet. Istud enim est dilemma huius rei tractatae: Ferê in omni disputatione commerciali, quae fit de societatis pornographizatione verâ aut putativâ, eadem ipsa etiam paululo augetur.

*comicus rapianus: Rap-Komiker; Sido, Berolini natus filius Germani et zingarae Sintianae, cuius nomen originale est Paul Würdig. Idem rapianus infamis est „Cantu pedicandi", verbis obsaenis, violentis, misogynis. **lusus convivalis - Angl. party-game; Theod. „Flaschendrehen" est genus talium lusuum. ***venus gregalis: Hôc loco agitur de speciali genere veneris gregalis, in quo una unusve a multis initur („gang-bang", cfr Wikipedia s.v.). ****Bushido (-onis m.): cantor rapianus a.1978 in Germaniâ natus, matris Germanae, patris Tunesiani, nomen originale Anis Mohamed Youssef Ferchichi, nomen sibi ascripsit Iaponicum, q.e. „Bushido" (valet viam pugnandi); infamis est violentiâ, obscaenitate, misogyniâ, misoxeniâ, phyletismo (Angl. racism), praedicat genus veneris gregalis a Franco Plasberg memoratum. Ceterum apud Martialem in quodam carmine duo genera veneris gregalis memorantur a Sabello poetâ descripta („symplegma" et „catena", MART.XII 43: Facundos mihi de libidinosis/ legisti nimium, Sabelle, versûs,/ quales nec Didymi sciunt puellae/ nec molles Elephantidos libelli./ Sunt illic Veneris novae figurae,/ quales perditus audeat fututor,/ praestent et taceant quid exoleti,/ quo symplegmate quinque copulentur,/ qua plures teneantur a catenâ,/extinctam liceat quid ad lucernam./ Tanti non erat esse te disertum. - *****orig.: „vom blondierten Ludentechnolieferanten und Scooter-Chef H.P. Baxter".