Vita eius insignis erat venere et drogis et musicâ roccianâ - tamen Micco Jagger Lapidum Volutabundorum (Rolling Stones) facile principi vita videbatur tam taediosa, ut desisteret ab eâdem describendâ, quamvis iam accepisset bellulam summam pecuniae in promutuum.

Londinio ex urbe - Co-auctorem, qui iussus erat litteris mandare confessionem vitae Jaggerianae, Miccius domum remisit: In „Daily Mail" actis diurnis Britannicis idem famosus musicus roccianus scribitur dixisse: „Hic illic cum aliquo sedebam, eidem infinitê narrabam de vitâ meâ praeteritâ et conabar in eâdem vivere. Quod mihi videbatur satis taediosum".

Finem rerum invenire placidum - quod problema Miccus bene novisse notum est.

Vita Micci famosa complectitur aliquot miliones musicae roccianae phonodiscorum discorumque compactorum, duo conubia (quae facta sunt cum Bianca Perez Morena de Macias filiâ ambasciatoris cumque Jerry Hall modellâ), innumerabiles amationes (Micci socia hôc tempore est Luciana Giminez Morad modella Brasiliana), poenae custodiariae propter drogarum possessionem acceptae, necnon nobilitatio ipsius Micci per Carolum principem Britanniae successorem regalem perpetrata.

Miccus 63 annos natus, qui hôc tempore unâ cum Lapidibus Volutabundis iter musicum facit per totum orbem terrarum, tamen non vult omni ratione excludere autobiographiam a se scribendam: „Cupio invenire aliud genus scribendi. Librum quidem scribam, sed non aliquod commentariolum huius generis typicum".